പുതുവത്സരാഘോഷത്തിന്റെ ഭാഗമായി ഡിസംബർ 31 ന് വൈകുന്നേരം ആഘോഷങ്ങൾ നടക്കുന്ന ചിലയിടങ്ങളിലേക്ക് ടാക്സി നിരക്ക് 20 ദിർഹം മുതലായിരിക്കുമെന്ന് ദുബായ് റോഡ്സ് & ട്രാൻസ്പോർട്ട് അതോറിറ്റി മുന്നറിയിപ്പ് നൽകി. ഹല ടാക്സി സേവനങ്ങൾക്കാണ് ഈ നിരക്ക് ബാധകമാകുക.
ഡിസംബർ 31 ഞായറാഴ്‌ച വൈകുന്നേരം ആറ് മണി മുതൽ അടുത്ത ദിവസം രാവിലെ ആറ് മണി വരെ ഫയർവർക്ക്സ് നടക്കുന്ന ലൊക്കേഷനുകളിലെല്ലാം ഈ നിരക്കുകൾ പ്രാബല്യത്തിൽ ഉണ്ടാകും. എന്നിരുന്നാലും ദുബായിലെ ടാക്സി നിരക്കുകൾ ടാക്സിയുടെ തരം, പിക്ക്-അപ്പ് സ്ഥലം, യാത്രയുടെ ദൈർഘ്യം, യാത്ര ചെയ്ത ദൂരം എന്നിവയെ ആശ്രയിച്ചായിരിക്കും നിരക്ക്. ദുബായിലെ സാധാരണ കുറഞ്ഞ ടാക്സി നിരക്ക് അല്ലെങ്കിൽ ഫ്ലാഗ് ഡൗൺ നിരക്ക് 12 ദിർഹമാണ്. ഇത് കൂടാതെ ഓരോ അധിക കിലോമീറ്ററിന് 1.97 ദിർഹവും നൽകണം.
