ആവേശോജ്വലമായ വനിതാ പ്രീമിയർ ലീഗ് ക്രിക്കറ്റിന് നാളെ തിരിതെളിയും. ആരാണ് അവസാന പോരാട്ടത്തിൽ കിരീടം ചൂടുകയെന്നറിയാൻ ആരാധകർ ഒന്നടങ്കം കാത്തിരിക്കുകയാണ്. കേരളത്തെ സംബന്ധിച്ച് ഈ മത്സരം ഇരട്ടി മധുരമാണ് നൽകുന്നത്. കാരണം കേരളത്തിന്റെ അഭിമാനമായ മിന്നു മണിയും അതോടൊപ്പം സജന സജീവനും ലീഗിലെ മലയാളി താരമായി തിളങ്ങും.
നിലവിലെ ചാംപ്യന്മാരായ മുംബൈ ഇന്ത്യൻസും രണ്ടാം സ്ഥാനക്കാരായ ഡൽഹി ക്യാപിറ്റൽസും തമ്മിലാണ് ഉദ്ഘാടന മത്സരം നടക്കുന്നത്. സ്മൃതി മന്ഥനയും ഹർമൻപ്രീത് കൗറും തന്നെയാണ് ലീഗിലെ രണ്ട് ക്യാപ്റ്റൻമാർ. ഹർമൻ മുംബൈ ഇന്ത്യൻസിനെയും സ്മൃതി റോയൽ ചാലഞ്ചേഴ്‌സ് ബാംഗ്ലൂരിനെയുമാണ് നയിക്കുക. ഇവർക്ക് പുറമെയുള്ള മറ്റ് മൂന്ന് ടീമുകളുടെയും ക്യാപ്റ്റൻമാർ ഓസ്ട്രേലിയൻ താരങ്ങളാണ്. മെഗ് ലാനിങ് ഡൽഹി ക്യാപിറ്റൽസിനെയും അലീസ ഹീലി യുപി വാരിയേഴ്‌സിനെയും ബെത് മൂണി ഗുജറാത്ത് ജയന്റ്സിനെയും നയിക്കും.
അഞ്ച് ടീമുകളാണ് ടൂർണമെന്റിൽ മാറ്റുരയ്ക്കുന്നത്. പ്രാഥമിക റൗണ്ടിൽ എല്ലാ ടീമുകളും പരസ്പരം രണ്ട് തവണ വീതമാണ് ഏറ്റുമുട്ടുക. പിന്നീട് പോയിന്റ് പട്ടികയിൽ ഒന്നാമതെത്തുന്ന ടീം നേരിട്ട് ഫൈനലിലെത്തുകയും ചെയ്യും. ആരാണ് ലീഗിന്റെ കിരീടം ചൂടുകയെന്ന് അറിയാനുള്ള കാത്തിരിപ്പിലാണ് ആരാധകർ.
