‘വെൽക്കം ടു രാജർഷി രാമവർമ സ്റ്റേഷൻ, എറണാകുളം ജംഗ്ഷൻ എന്ന ബോർഡിൽ ഈ പുതിയ അക്ഷരങ്ങൾ തെളിയും. റയിൽവേ സ്റ്റേഷനിലെ അനൗൺസ്മെന്റിൽ ഇനി ഇങ്ങനെയായിരിക്കും കേൾക്കുക. കൊച്ചിയുടെ സ്വന്തം എറണാകുളം സൗത്ത് റയിൽവേ സ്റ്റേഷന് ഇനി പുതിയ മുഖം. റയിൽവേ സ്റ്റേഷന് കൊച്ചി രാജാവായിരുന്ന രാജർഷി രാമവർമന്റെ പേര് നൽകണമെന്ന പ്രമേയം കൊച്ചി കോർപ്പറേഷൻ പാസാക്കി.
രാജ്യസ്വത്ത് വിറ്റ് വികസനം കൊണ്ടുവന്ന രാജാവാണ് രാജർഷി രാമവർമൻ. അദ്ദേഹത്തിന്റെ പേരിൽ സ്റ്റേഷൻ അറിയപ്പെടുന്നത് ഭാഗ്യമാണെന്ന് മേയർ എം അനിൽകുമാർ പറഞ്ഞു. കൂടാതെ എറണാകുളം സൗത്ത് റെയിൽവേ സ്റ്റേഷന് രാജർഷി രാമവർമന്റെ പേരു നൽകണമെന്ന് കേന്ദ്ര സംസ്ഥാന സർക്കാരുകളോടും ഇന്ത്യൻ റെയിൽവേയോടും ആവശ്യപ്പെടാനാണ് കൊച്ചി കോർപറേഷൻ്റെ തീരുമാനമെന്നും അദ്ദേഹം വ്യക്തമാക്കി.
ഷൊർണൂർ മുതൽ എറണാകുളം വരെ ഒരു റെയിൽവേ പാത നിർമിക്കുക എന്നതിന് പിന്നിൽ രാജർഷി രാമവർമ്മന്റെ ദീർഘകാലത്തെ പ്രയത്നമുണ്ട്. അത്തരമൊരു മഹത് വ്യക്തിയുടെ പേര് നേരത്തെ തന്നെ വരേണ്ടതായിരുന്നു. അതുകൊണ്ടാണ് എറണാകുളം സൗത്ത് സ്റ്റേഷന് അദ്ദേഹത്തിന്റെ പേര് നൽകണമെന്ന് നഗരസഭ ആവശ്യപ്പെടുന്നത്. എന്നാൽ ഇത് രാജഭരണത്തോടുള്ള അനാവശ്യമായ ഭക്തിയല്ലെന്നും മേയർ കൂട്ടിച്ചേർത്തു. കൊച്ചി കോർപറേഷനിൽ കഴിഞ്ഞദിവസം ചേർന്ന കൗൺസിൽ യോഗത്തിലാണ് റയിൽവേ സ്റ്റേഷന് രാജാവിന്റെ പേര് നൽകണമെന്ന പ്രമേയം മുന്നോട്ടുവെച്ചത്.
