യുഎഇ ദേശീയ ദിനം പ്രമാണിച്ച് ഷാർജയിലും അജ്മാനിലും സർക്കാർ ജീവനക്കാർക്ക് അവധി പ്രഖ്യാപിച്ചു. ജീവനക്കാർക്ക് ശമ്പളത്തോടുകൂടിയ അവധിയാണ് മാനവ വിഭവശേഷി വകുപ്പ് പ്രഖ്യാപിച്ചത്.
ഡിസംബർ 2, 3 തീയതികളിൽ അജ്മാനിലെ പൊതുമേഖലാ ജീവനക്കാർക്ക് ഔദ്യോഗിക അവധിയായിരിക്കുമെന്ന് എമിറേറ്റ് മാനവവിഭവശേഷി വകുപ്പ് അറിയിച്ചു. ഇതോടൊപ്പം വാരാന്ത്യ അവധിയായ ശനിയും ഞായറും ചേരുമ്പോൾ നാല് ദിവസത്തെ അവധിയാണ് എമിറേറ്റിലെ സർക്കാർ ജീവനക്കാർക്ക് ലഭിക്കുക.
ഷാർജയിലെ സർക്കാർ ജീവനക്കാർക്ക് യുഎഇ ദേശീയ ദിനത്തിൽ അഞ്ച് ദിവസത്തെ അവധി ലഭിക്കുമെന്ന് പ്രാദേശിക അധികാരികൾ സ്ഥിരീകരിച്ചു. ഡിസംബർ 2, 3 (തിങ്കൾ, ചൊവ്വ) ദിവസങ്ങളിൽ ശമ്പളത്തോടുകൂടിയ അവധിയോടൊപ്പം ഔദ്യോഗിക വാരാന്ത്യമായ വെള്ളി, ശനി, ഞായർ ദിവസങ്ങൾ കൂടി കണക്കാക്കുമ്പോൾ അഞ്ച് ദിവസത്തെ നീണ്ട അവധിയാണ് ലഭിക്കുക.
അവധിക്ക് ശേഷം ഡിസംബർ 4 മുതൽ പതിവ് പ്രവർത്തനങ്ങൾ പുനരാരംഭിക്കുമെന്നും അധികൃതർ വ്യക്തമാക്കി. മന്ത്രാലയങ്ങൾക്കും ഫെഡറൽ സ്ഥാപനങ്ങൾക്കും യുഎഇ സർക്കാർ അവധി പ്രഖ്യാപിച്ചതിന് തൊട്ടുപിന്നാലെയാണ്
പുതിയ പ്രഖ്യാപനം.
