കരുനാഗപ്പള്ളി മുൻ എംഎൽഎയും സിപിഐ നേതാവുമായ ആർ. രാമചന്ദ്രൻ (62) അന്തരിച്ചു. ഇന്ന് പുലർച്ചെ കൊച്ചിയിലെ സ്വകാര്യ ആശുപത്രിയിൽ വെച്ചായിരുന്നു അന്ത്യം. കരൾ സംബന്ധമായ അസുഖത്തെത്തുടർന്ന് ചികിത്സയിലായിരുന്നു. സംസ്കാരം നാളെ വീട്ടുവളപ്പിൽ നടക്കും.
വിദ്യാർത്ഥി രാഷ്ട്രീയത്തിലൂടെ പൊതുപ്രവർത്തനം തുടങ്ങിയ രാമചന്ദ്രൻ 2016 -ലെ തിരഞ്ഞെടുപ്പിലാണ് കരുനാഗപ്പള്ളിയിൽ നിന്ന് വിജയിച്ച് എംഎൽഎ ആയത്. കഴിഞ്ഞ തിരഞ്ഞെടുപ്പിലും മത്സരിച്ചിരുന്നു. സിപിഐ കരുനാഗപ്പള്ളി താലൂക്ക് കമ്മിറ്റി സെക്രട്ടറിയായും, താലൂക്ക് കമ്മിറ്റി വിഭജിച്ചപ്പോൾ ചവറ മണ്ഡലം സെക്രട്ടറിയായും പ്രവർത്തിച്ചു. ദീർഘകാലം സിപിഐ ജില്ലാ അസിസ്റ്റന്റ് സെക്രട്ടറിയും 2012-ൽ ജില്ലാ സെക്രട്ടറിയുമായി. എൽഡിഎഫ് ജില്ലാ കൺവീനറും 2006 -11 കാലയളവിൽ സിഡ്കോ ചെയർമാനുമായി. 2004-ൽ ജില്ലാ പഞ്ചായത്ത് വൈസ് പ്രസിഡൻ്റുമായിരുന്നു.
ഭാര്യ: തിരുവിതാംകൂർ ദേവസ്വം ബോർഡിൽ നിന്ന് അക്കൗണ്ടൻ്റായി വിരമിച്ച പ്രിയദർശിനി. മകൾ: ദീപ ചന്ദ്രൻ. മരുമകൻ: അനിൽ കുമാർ.
