ഈ വർഷത്തെ ഹജ്ജ് തീർത്ഥാടനത്തിനായി സംസ്ഥാന ഹജ്ജ് കമ്മിറ്റി മുഖേനയുള്ള അപേക്ഷ സമർപ്പണം പൂർത്തിയായി. അപേക്ഷകളുടെ സൂക്ഷ്മ പരിശോധന ഇന്ന് പൂർത്തിയാകും.
24,733 പേരാണ് ഇത്തവണ ഹജ്ജിനായി അപേക്ഷ നൽകിയത്. ലഭിച്ച അപേക്ഷകളിൽ സൂക്ഷ്മ പരിശോധനകൾക്ക് ശേഷം 23,111 പേർക്ക് ഇതിനകം കവർ നമ്പറുകൾ നൽകി. അവസാന രണ്ട് ദിവസങ്ങളിലായി ലഭിച്ച 1,500ഓളം അപേക്ഷകൾക്കാണ് ഇനി കവർ നമ്പറുകൾ നൽകാനുള്ളത്. ഇതിന്റെ നടപടി ക്രമങ്ങൾ ഇന്ന് പൂർത്തിയാകും.
കഴിഞ്ഞ വർഷം സംസ്ഥാനത്ത് 19,524 അപേക്ഷകളാണ് ലഭിച്ചത്. ഇതിൽ 11,252 പേർക്ക് ഹജ്ജിനുളള അവസരം ലഭിച്ചു. ഇത്തവണ അപേക്ഷകരിൽ വലിയ വർദ്ധനയാണുണ്ടായത്. 19,882 പേർ ജനറൽ വിഭാഗത്തിലും 1,266 പേർ 70 വയസിന് മുകളിലുള്ളവരുടെ വിഭാഗത്തിലും 3,585 പേർ ലേഡീസ് വിതൗട്ട് മെഹ്‌റം വിഭാഗത്തിലുമാണ് അപേക്ഷ നൽകിയത്. ഇത്തവണ സംസ്ഥാനത്ത് മൂന്ന് ഹജ്ജ് എമ്പാർക്കേഷൻ പോയന്റുകളാണുള്ളത്.
