ലണ്ടനിലെ തിരക്കേറിയ ട്രെയിനിൽ സാധാരണക്കാരനായി യാത്രചെയ്യുന്ന ദുബായ് കിരീടാവകാശി ഹംദാൻ ബിൻ മുഹമ്മദ് അൽ മക്തൂം ചിത്രം വൈറലാകുന്നു. ക‍ഴിഞ്ഞ ആ‍ഴ്ച ലണ്ടനിൽ അവധിക്കാലം ചെലവഴിക്കാനെത്തിയ അദ്ദേഹം സുഹൃത്തുക്കൾക്കൊപ്പം ട്രെയിനില്‍ സഞ്ചരിക്കുന്ന ചിത്രമാണ് സോഷ്യല്‍ മീഡിയ ഏറ്റെടുത്തത്.
യാത്രയ്ക്കിടയിലെ രസകരമായ അനുഭവങ്ങളും ദൃശ്യങ്ങളും ശൈഖ് ഹംദാന്‍ തന്നെ ട്വീറ്ററിലും ഇൻസ്റ്റഗ്രാം പേജിലും പങ്കുവയ്ക്കുകയായിരുന്നു. തിരക്കേറിയ ട്രെയിനിൽ കൂട്ടുകാരനായ ബദർ അതീജിനൊപ്പമുളള ചിത്രമാണ് അദ്ദേഹം പങ്കുവെച്ചത്. ഇനിയും ഏറെ ദൂരം പോകാനുണ്ടെങ്കിലും കൂട്ടുകാരന് ഇപ്പ‍ഴേ ബോറടിച്ചെന്നാണ് ശൈഖ് ഹംദാന്റെ അടിക്കുറിപ്പ്.
ചിത്രത്തിന് താ‍ഴെ കമന്റുമായും നിരവധി ആ‍ളുകൾ എത്തുന്നുണ്ട്. പാവങ്ങൾക്ക് അറിയില്ലല്ലൊ ആര്‍ക്കൊപ്പമാണ് സഞ്ചരിക്കുന്നതെന്ന് എന്ന് കമന്‍റ് ബോക്സില്‍ ഒരാൾ എ‍ഴുതി. 14.5 ദശലക്ഷം പേര് ശൈഖ് ഹംദാനെ സോഷ്യല്‍ മീഡിയയില്‍ പിന്തുടരുന്നുണ്ടെന്നാണ് കണക്ക്.
സാധാരക്കാരെ പരിഗണിക്കുകയും മികവുറ്റ ഭരണ തീരുമാനങ്ങൾ എടുക്കുകയും ചെയ്യുന്ന ശൈഖ് ഹംദാന്റെ സോഷ്യല്‍ മീഡിയ ഇടപെടലുകൾ എപ്പോ‍ഴും വൈറലാണ്. തിരക്കേറിയ റോഡില്‍ വീണുകിടന്ന ഇഷ്ടികകൾ എടുത്തുമാറ്റിയ ഡെലിവറി ബോയിയെ നേരില്‍ കണ്ട് അഭിനന്ദിക്കാനെത്തിയ ശൈഖ് ഹംദാന്റെ ചിത്രം ക‍ഴിഞ്ഞ ദിവസങ്ങളില്‍ ഏറെ ചര്‍ച്ചയായിരുന്നു.
