ദുബായിൽ കെട്ടിടങ്ങൾ ഭിന്നശേഷി സൗഹൃദമാണെന്ന് ഉറപ്പാക്കാൻ വുസൂൽ മുദ്ര നിർബന്ധമാക്കി. ദുബായിൽ പുതിയതായി നിർമ്മിക്കുന്ന എല്ലാ കെട്ടിടങ്ങൾക്കും ഈ മുദ്ര നിർബന്ധമാണെന്ന് മുനിസിപ്പാലിറ്റി അറിയിച്ചു. നിർമ്മാണ രീതികൾ ഏകീകരിക്കുന്നതിനുള്ള ദുബായ് ബിൽഡിങ് കോഡിന്റെ ഭാഗമായാണ് വുസൂൽ മുദ്ര നിർബന്ധമാക്കുന്നത്. താമസം, വ്യാപാരം, മാർക്കറ്റ് തുടങ്ങി എല്ലാ കെട്ടിടങ്ങൾക്കും ഈ നിബന്ധന ബാധകമായിരിക്കും. നിർമ്മാണ അനുമതികൾ നൽകുന്നതിനുള്ള പ്രധാന മാനദണ്ഡമായി വുസൂൽ മുദ്ര കണക്കാക്കുമെന്ന് അധികൃതർ അറിയിച്ചു.
ദുബായിൽ നടക്കുന്ന ആക്സസബിലിറ്റീസ് പ്രദർശനത്തിലാണ് ദുബായ് മുനിസിപ്പാലിറ്റി വൂസൂൽ മുദ്ര അവതരിപ്പിച്ചത്. ഭിന്നശേഷിക്കാർക്ക് അനുയോജ്യമായ കെട്ടിടങ്ങൾ, എളുപ്പത്തിൽ പ്രവേശിക്കാനാവുന്ന വാതിലുകൾ, എൻട്രി – എക്സിറ്റ് കവാടങ്ങൾ, നടപ്പാതകൾ, ആരോഗ്യ സേവനങ്ങൾ, പ്രത്യേക മുറികൾ, പാർക്കിങ് സ്ഥലങ്ങൾ തുടങ്ങിയ സൗകര്യങ്ങൾ ഉറപ്പാക്കിയാൽ മാത്രമേ കെട്ടിടങ്ങൾക്ക് നിർമ്മാണ അനുമതി നൽകുകയുള്ളൂവെന്ന് ദുബായ് മുനിസിപ്പാലിറ്റി ഡയറക്ടർ ജനറൽ ദാവൂദ് അൽ ഹജി പറഞ്ഞു.
