വാർഷിക എയർലൈൻസ് എക്സലൻസ് അവാർഡുകളിൽ മിഡിൽ ഈസ്റ്റിൽ നിന്നുള്ള എയർലൈനുകൾ മികച്ച നേട്ടം സ്വന്തമാക്കി. എയർലൈൻ എക്സലൻസ് അവാർഡിലെ ‘ബെസ്റ്റ് ഇൻഫ്ലൈറ്റ് എൻ്റർടൈൻമെൻ്റ് അവാർഡ്’ എമിറേറ്റ്സ് സ്വന്തമാക്കി. ഖത്തർ എയർവേയ്‌സിന് 2024-ലെ മികച്ച കാറ്ററിംഗ് അവാർഡും ലഭിച്ചു. ‘ബെസ്റ്റ് ഇൻഫ്ലൈറ്റ് എൻ്റർടൈൻമെൻ്റ് അവാർഡ്’ കരസ്ഥമാക്കാൻ എമിറേറ്റ്സിനെ സഹായിച്ചത് നിരവധി ഘടകങ്ങളുണ്ട്.
6,500 ചാനലുകൾ ഉൾപ്പെടുന്ന ആകാശത്തിലെ തന്നെ ഏറ്റവും വലിയ വിനോദ ലൈബ്രറിയാണ് എമിറേറ്റ്സിന് ഈ അവാർഡ് കരസ്ഥമാക്കാൻ സഹായകമായത്. എമിറേറ്റ്സ് ഫ്ലൈറ്റുകളിലെ യാത്രക്കാർക്ക് 6,500 ചാനലുകളുള്ള ഒരു ലോകോത്തര വിനോദ ലൈബ്രറി ആക്‌സസ് ചെയ്യാം. 2000-ലധികം ഹോളിവുഡ് സിനിമകൾ എമിറേറ്റ്സ് യാത്രക്കാർക്ക് ആസ്വദിക്കാൻ സാധിക്കുന്നുണ്ട്. പ്രമുഖ സ്ട്രീമിംഗ് പ്ലാറ്റ്‌ഫോമുകളിൽ നിന്നും HBO Max, Discovery+, BBC, Bloomberg Originals, Shahid തുടങ്ങിയ മീഡിയ ബ്രാൻഡുകളിൽ നിന്നുമുള്ള ഏറ്റവും പുതിയ ഷോകൾ ഉൾപ്പെടെ നൂറുകണക്കിന് സമ്പൂർണ ടിവി പരമ്പരകളും ആസ്വദിക്കാം.
200-ലധികം ഡോക്യുമെൻ്ററി സിനിമകളും ജനപ്രിയ ടിവി ഡോക്യു-സീരീസുകളും. എമിറാത്തി സിനിമകളുടെ ശേഖരം ഉൾപ്പെടെ 150-ലധികം അറബി സിനിമകളും ടിവി ഷോകൾ.13 ഭാഷകളിലായി 300-ലധികം ബോളിവുഡ്, ദക്ഷിണേഷ്യൻ സിനിമകളും ടിവി ഷോകളും എമിറേറ്റ്സ് യാത്രക്കാർക്ക് യാത്രവേളയിൽ ആസ്വദിക്കാൻ സാധിക്കുന്നുണ്ട്. യൂറോപ്പ്, ആഫ്രിക്ക, ഏഷ്യ, ലാറ്റിൻ അമേരിക്ക എന്നിവിടങ്ങളിൽ നിന്നായി 50-ലധികം ഭാഷകളിൽ 600-ലധികം അന്തർദ്ദേശീയ സിനിമകൾ, കുട്ടികളുടെ സൗകര്യത്തിനായി പ്രത്യേകം രൂപകൽപ്പന ചെയ്ത എമിറേറ്റ്സ് ഹെഡ്‌ഫോണുകൾ, 3,500-ലധികം ആൽബങ്ങളുടെയും ക്യൂറേറ്റ് ചെയ്ത പ്ലേലിസ്റ്റുകളുടെയും സംഗീത ലൈബ്രറി എന്നിവയെല്ലാമാണ് എമിറേറ്റ്സിനെ ഈ അംഗീകാരത്തിലേക്ക് എത്തിച്ചത്.
