സൗദി അറേബ്യയുടെ ചരിത്രത്തിലേക്ക് ഒരു പുതിയ പാത കൂടി. തലസ്ഥാന നഗരിയെ ചരിത്രപ്രസിദ്ധമായ ദറഇയ പൗരാണിക നഗരവുമായി ബന്ധിപ്പിക്കുന്ന പുതിയ ദറഇയ തുരങ്കപാത ഗതാഗതത്തിനായി തുറന്നുകൊടുത്തു. ഗതാഗത ലോജിസ്റ്റിക്‌സ് മന്ത്രി സ്വാലിഹ് അൽജാസർ തുരങ്ക പാതയുടെ ഉദ്ഘാടനം നിർവഹിച്ചു. റിയാദ് നഗരത്തിലെ വെസ്റ്റേൺ റിങ് റോഡിൽ എക്സിറ്റ് 38ലാണ് പുതിയ തുരങ്കപാത.
രണ്ടു വർഷം മുൻപാണ് എട്ടു പാതകൾ ഉൾപ്പെടുന്ന ദറഇയ തുരങ്കത്തിന്റെ നിർമാണ പ്രവർത്തനങ്ങൾ ആരംഭിച്ചത്. ആഭ്യന്തര മന്ത്രാലയം, റിയാദ് മുനിസിപ്പാലിറ്റി, ഗതാഗത ലോജിസ്റ്റിക് സേവന മന്ത്രാലയം, ബന്ധപ്പെട്ട അധികാരികൾ എന്നിവരുമായി സഹകരിച്ചാണ് തുരങ്കത്തിന്റെ അടിസ്ഥാന സൗകര്യങ്ങൾ വികസിപ്പിക്കുന്നതിനുള്ള പ്രവർത്തനങ്ങൾ നടത്തിയത്. തുരങ്കത്തിന് 435 മീറ്റർ നീളമുണ്ട്. 70 ലക്ഷത്തിലധികം മണിക്കൂർ ജോലി ചെയ്താണ് ഇതിെൻറ പണി പൂർത്തിയാക്കിയത്. മണിക്കൂറിൽ 10,200 വാഹനങ്ങൾക്ക് കടന്നുപോകാൻ കഴിയും.
നൂതന സാങ്കേതിക വിദ്യകൾ അനുസരിച്ച് നടപ്പാക്കിയ തുരങ്കം ദറഇയ പദ്ധതി, റിയാദ്, വെസ്റ്റേൺ റിങ് റോഡ് എന്നിവയെ ബന്ധിപ്പിക്കും. ദറഇയയിലെ ചരിത്രപരവും പൈതൃകവുമായ സ്ഥലങ്ങളിലേക്കുള്ള പ്രവേശനം സുഗമമാക്കുന്നതിനും അതിലേക്കുള്ള ഗതാഗതം സുഗമമാക്കുന്നതിനും ഈ തുരങ്കപാത സഹായിക്കും. പ്രദേശവാസികളുടെയും സന്ദർശകരുടെയും സഞ്ചാരവും എ തുരങ്ക പാത എളുപ്പമാക്കും. ദറഇയയിലെ ചരിത്രപ്രസിദ്ധമായ അൽതുറൈഫ് ഡിസ്ട്രിക്റ്റ്, അൽബുജൈരി ടവർ,ബാബ് സംഹാൻ ഹോട്ടൽ തുടങ്ങിയ പൈതൃകങ്ങളിലേക്കും ടൂറിസ്റ്റ് സൈറ്റുകളിലേക്കും പ്രവേശനം സുഗമമാക്കും.
അതേസമയം റിയാദിലെ വെസ്റ്റേൺ റിങ് റോഡിൽ 435 മീറ്റർ നീളമുള്ള ദറഇയ തുരങ്കപാത ഒരു സുപ്രധാന പദ്ധതിയായിരുന്നെന്നും ഇത് ചരിത്രപ്രസിദ്ധമായ ദറഇയയിലേക്കുള്ള പ്രവേശന കവാടത്തെ വിനോദസഞ്ചാര, പൈതൃക കേന്ദ്രങ്ങളുമായി ബന്ധിപ്പിക്കുന്നതാണെന്ന് ഗതാഗത ലോജിസ്റ്റിക് മന്ത്രി പറഞ്ഞു. നഗരത്തിന്റെ സാംസ്കാരികവും ചരിത്രപരവുമായ ഭൂപ്രകൃതി സംരക്ഷിക്കുന്നതിനോടൊപ്പം രാജ്യത്തിനകത്തും പുറത്തും നിന്നുള്ള സന്ദർശകരെയും വിനോദസഞ്ചാരികളെയും സ്വാഗതം ചെയ്യുന്നതിനും അടിസ്ഥാന സൗകര്യങ്ങൾ ശക്തിപ്പെടുത്തുന്നതിനും തുരങ്ക പാത സഹായിക്കും. മാത്രമല്ല, ചുറ്റുമുള്ള സേവന സൗകര്യങ്ങൾ വികസിപ്പിക്കുന്നതിനുള്ള ദറഇയയുടെ പ്രതിബദ്ധതയാണ് പുതിയ തുരങ്കപാതയെന്ന് ദറഇയ ഗ്രൂപ് സി.ഇ.ഒ ജെറി ഇൻസെറില്ലോ പറഞ്ഞു.
ചരിത്രപരവും സാംസ്കാരികവുമായ ഒരു കേന്ദ്രമായി ആഗോള ഭൂപടത്തിൽ ദറഇയയെ മാറ്റാനും ലോകമെമ്പാടുമുള്ള ഒരു പ്രധാന ആകർഷണമായി അതിന്‍റെ അംഗീകാരം വർധിപ്പിക്കാനുമുള്ള ലക്ഷ്യത്തോടെയാണ് തുരങ്ക പാത പൂർത്തിയാക്കിയിരിക്കുന്നത്. രാജ്യത്തെ ഏറ്റവും വലിയ പാർക്ക് നിർമിക്കാൻ തുരങ്കത്തിന് മുകളിലുള്ള സ്ഥലം ഉപയോഗിക്കും. പുതിയ പാർക്ക് ചരിത്രപ്രസിദ്ധമായ ദറഇയ, കിങ് സഊദ് സർവകലാശാല, കിങ് സൽമാൻ അവന്യൂ (ബൊളിവാർഡ്), എന്നിവിടങ്ങൾക്കിടയിൽ അതിവിശാലമായി സ്ഥിതി ചെയ്യും. ദറഇയയിലേക്കുള്ള സന്ദർശകർക്ക് ഭൂതകാലത്തിൽ നിന്ന് വർത്തമാനത്തിലേക്കുള്ള യാത്ര പ്രതിഫലിപ്പിക്കുന്ന അനുഭവമുണ്ടാകുന്നതിന് വേണ്ടിയാണിതെന്നും സി.ഇ.ഒ കൂട്ടിച്ചേർത്തു. റിയാദ് മുനിസിപ്പാലിറ്റി ഫോർ ഓപറേഷൻ ആൻഡ് മെയിൻറനൻസ് അണ്ടർ സെക്രട്ടറി അഹമ്മദ് അൽബലവി, പൊതുസുരക്ഷ ഡയറക്ടർ ലെഫ്റ്റനൻറ് ജനറൽ മുഹമ്മദ് അൽബസ്സാമി, എന്നിവർ ഉദ്ഘാടന ചടങ്ങിൽ പങ്കെടുത്തു.
