ഒമാനിലെ ‘മസീറ വിന്റർ ഫോറം’ വെള്ളിയാഴ്ച നടക്കും. വിനോദ സഞ്ചാരത്തിന്റെയും പ്രാദേശിക കരകൗശലങ്ങളുടെയും പ്രോത്സാഹനത്തിനായുള്ള വാർഷിക പരിപാടിയാണ് മസീറ വിന്റർ ഫോറം. ബീച്ചുകൾക്കും പൈതൃകത്തിനും പേരുകേട്ട ഒമാനിലെ ഏറ്റവും വലിയ ദ്വീപായ മസീറയിൽ മുനിസിപ്പാലിറ്റിയാണ് ഫോറം സംഘടിപ്പിക്കുന്നത്.
പൈതൃകത്തെ പ്രോത്സാഹിപ്പിക്കുന്നതിനോടൊപ്പം ദ്വീപിലെ കരകൗശല വ്യവസായങ്ങളെ മറ്റ് സർക്കാർ, സ്വകാര്യ, സിവിൽ അധികാരികളുടെ സഹകരണത്തോടെ ഉയർത്തുകകയാണ് ഈ പരിപാടിയിലൂടെ മുനിസിപ്പാലിറ്റി ലക്ഷ്യമിടുന്നത്. ജനുവരി 26വരെ മസീറ ദ്വീപിലെ സീ പാർക്കിലായിരിക്കും പരിപാടി നടക്കുക എന്ന് മുനിസിപ്പാലിറ്റി ഉദ്യോഗസ്ഥൻ പറഞ്ഞു. കഴിഞ്ഞ കുറച്ച് വർഷങ്ങളായി ഒമാനിൽ നിന്ന് മാത്രമല്ല ലോകത്തിന്റെ മറ്റ് ഭാഗങ്ങളിൽ നിന്നും വിനോദസഞ്ചാരികൾ ഇവിടേക്ക് എത്തുന്നുണ്ടെന്നും ഉദ്യോഗസ്ഥർ കൂട്ടിച്ചേർത്തു.
കരകൗശല വ്യവസായങ്ങളെ കൂടുതൽ ജനകീയമാക്കുന്നതിനും പ്രാദേശിക സേവനങ്ങൾക്കും സാധാരണ കുടുംബങ്ങൾ പ്രാദേശികമായി നിർമ്മിക്കുന്ന ഉൽപ്പന്നങ്ങൾക്കും പരിപാടി പ്രോത്സാഹനം നൽകാൻ സഹായിക്കും. ഫോറത്തിന്റെ ഒരാഴ്ചത്തെ പ്രവർത്തനങ്ങളിൽ കുട്ടികളുടെ മത്സരങ്ങളിലും ബീച്ച് ഗെയിമുകളിലും ബീച്ച് വോളിബാൾ, ബീച്ച് സോക്കർ, മാരത്തൺ റേസ് എന്നിവയാണ് ഉൾപ്പെടുത്തിയിട്ടുള്ളത്.
