പണമിടപാടുകൾ ഇന്ന് ഹൈ ടെക് ആണ്. ഓൺലൈൻ പേയ്‌മെന്റ് നടത്തുന്നവരാണ് കൂടുതലും. അതുകൊണ്ട് തന്നെ എവിടെ നോക്കിയാലും ഇ-പേയ്‌മെന്റ് നടത്താനുള്ള സ്കാനറോ മറ്റ് ഉപകരണങ്ങളോ കാണാൻ കഴിയും. ഒരു വർഷം മുൻപ് ഒമാനിലെ വാണിജ്യ സ്ഥാപനങ്ങളിൽ ഇത്തരത്തിലുള്ള ഇ-പേമെന്‍റ് സംവിധാനം നിർബന്ധമാക്കിയിരുന്നു. സേവനം ഒരുക്കാത്തവർക്ക് പിഴ നൽകുമെന്ന നിർദേശവും അധികൃതർ നൽകി. കൂടാതെ ഉപഭോക്താക്കൾക്ക് ഇ-പേമെന്‍റ് സേവനം നൽകുന്നതുമായി ബന്ധപ്പെട്ട് കട ഉടമകൾക്കായി നിരവധി ബോധവത്കരണ പരിപാടികളും മന്ത്രാലയം നടത്തിയിരുന്നു.
അത്തരത്തിൽ ഇ-പേമെന്‍റ് സംവിധാനം ഒരുക്കാത്തതിന് ആയിരത്തിലധികം സ്ഥാപനങ്ങൾക്ക് വാണിജ്യ, വ്യവസായ, നിക്ഷേപ പ്രോത്സാഹന മന്ത്രാലയം പിഴ ചുമത്തി. അധികൃതർ നടത്തിയ പരിശോധനയിൽ 1,183 സ്ഥാപനങ്ങൾ ഇ-പേമെന്‍റ് സംവിധാനം ഒരുക്കിയിട്ടില്ലെന്ന് കണ്ടെത്തിയതിനെ തുടർന്നാണ് പിഴ. 4,900 സ്റ്റോറുകളിലാണ് മന്ത്രാലയം പരിശോധന നടത്തിയത്. ക്രയവിക്രയ പ്രവർത്തനങ്ങൾ, കസ്റ്റമർ സർവിസ് മാനേജ്‌മെന്റ്, ഫിനാൻഷ്യൽ എന്നിവ ത്വരിതപ്പെടുത്തുന്നതിന് പുറമേ പണമിടപാടിലെ സുരക്ഷാ അപകടസാധ്യതകൾ കുറയ്ക്കുക, സമഗ്രമായ ഡിജിറ്റൽ പരിവർത്തനം കൈവരിക്കുക തുടങ്ങിയ ശ്രമങ്ങളുടെ ഭാഗമായാണ് ഇ-പേമെന്‍റ് ഒരുക്കിയിരിക്കുന്നത്. കൂടാതെ മോഷണം, വഞ്ചന, വ്യാജ ബില്ലിങ് എന്നിവ തടയലുമാണ് ഇ-പെയ്‌മെന്റ് സംവിധാനത്തിലൂടെ ലക്ഷ്യമിടുന്നത്.
2022 ജനുവരിയിലാണ് വ്യാപാരസ്ഥാപനങ്ങളിൽ ഇ-പേമെന്‍റ് സംവിധാനം അധികൃതർ നിർബന്ധമാക്കിയത്. ഇതിനെ തുടർന്ന് പല സ്ഥാപനങ്ങളും സംവിധാനം ഏർപ്പെടുത്തുകയും ചെയ്തു. ഇതുവരെയും സംവിധാനം ഏർപ്പെടുത്താത്ത സ്ഥാപങ്ങൾക്കെതിരൊയണ് ഇപ്പോൾ നടപടി സ്വീകരിക്കുന്നത്. ഫുഡ് സ്റ്റഫ് സ്ഥാപനങ്ങൾ, റസ്റ്റാറൻറുകൾ, കഫേകൾ, സ്വർണം-വെള്ളി വ്യാപാര സ്ഥാപനങ്ങൾ, ഇലക്ട്രോണിക് സ്ഥാപനങ്ങൾ, പച്ചക്കറി പഴ വർഗ വ്യാപാരസ്ഥാപനങ്ങൾ, കെട്ടിട നിർമാണ ഉൽപന്നങ്ങൾ വിൽക്കുന്ന സ്ഥാപനങ്ങൾ, പുകയില ഉൽപന്നങ്ങൾ വിൽക്കുന്ന സ്ഥാപനങ്ങൾ, മാളുകൾ, ഗിഫ്റ്റ് ഇനങ്ങൾ വിൽക്കുന്ന സ്ഥാപനങ്ങൾ,വ്യവസായ മേഖല, കോംപ്ലക്സുകൾ എന്നിവയിലാണ് നിലവിൽ ഇ-പേമെൻറ് സംവിധാനം നടപ്പാക്കിയിട്ടുള്ളത്.
