ഖത്തറിലും മലയാളി വിദ്യാർത്ഥി സ്റ്റാറായി മാറി. ഉന്നത വിജയം നേടിയതിന് പിന്നാലെ ഖത്തർ അമീറിൽ നിന്ന് സ്വർണ മെഡൽ ഏറ്റുവാങ്ങി ശ്രദ്ധേയനായിരിക്കുകയാണ് ഒരു മലയാളി വിദ്യാർത്ഥി. തിരുവല്ല വളഞ്ഞവട്ടം സ്വദേശി ജോഷ് ജോൺ ജിജിയാണ് അപൂർവ്വ നേട്ടത്തിന് അർഹനായത്.
ഖത്തർ സർവകലാശാലയിൽ നിന്ന് ഉന്നത വിജയം നേടിയവർക്കുള്ള സ്വർണ മെഡൽ അമീർ ഷെയ്ഖ് തമീം ബിൻ ഹമദ് അൽത്താനിയിൽ നിന്നാണ് ജോഷ് ജോൺ ജിജി നേരിട്ട് ഏറ്റുവാങ്ങിയത്. ബയോളജിക്കൽ എൻവയോൺമെന്റ് സയൻസിലാണ് ജോഷ് ഉന്നത വിജയം നേടിയത്.
ചില വിദ്യാർത്ഥികൾക്ക് മാത്രമാണ് അമീർ നേരിട്ട് സ്വർണമെഡൽ കൈമാറിയത്. അക്കൂട്ടത്തിലാണ് ജോഷും ഉൾപ്പെട്ടത്. ഖത്തർ യൂണിവേഴ്സിറ്റിയിൽ റിസർച്ച് അസിസ്റ്റന്റാണ് ജോഷ് ജോൺ ജിജി. ഇട്ടിയംപറമ്പിൽ ജിജിയുടെയും ഗീതയുടെയും മകനാണ് ജോഷ്. സഹോദരി ഡോ. ജോയൽ.
