ഇന്ത്യയിൽ നിന്നുള്ള ഹജ്ജ് വിമാന സർവീസുകൾ മെയ് 21 മുതൽ ആരംഭിക്കും. കേരളത്തിൽ നിന്നും ജൂൺ 7നാണ് സർവീസ് ആരംഭിക്കുക. ഹജ്ജിന് അപേക്ഷിക്കാനുള്ള സമയപരിധിയും നാളെ അവസാനിക്കും.
ജൂൺ അവസാനം നടക്കുന്ന ഈ വർഷത്തെ ഹജ്ജിനായി വിദേശ തീർഥാടകർ മെയ് 21നു സൗദിയിൽ എത്തിത്തുടങ്ങും. ജൂൺ 22ഓടെ പൂർത്തിയാകുന്ന രീതിയിലാണ് ഹജ്ജ് വിമാന സർവീസുകൾ സജ്ജീകരിച്ചിരിക്കുന്നത്. കർമങ്ങൾ അവസാനിച്ച് ജൂലൈ രണ്ട് മുതൽ തീർഥാടകർ മടങ്ങിത്തുടങ്ങും. ഇന്ത്യയിൽ നിന്നുള്ള ഹജ്ജ് വിമാന സർവീസുകളുടെ ഒന്നാം ഘട്ടമാണ് മെയ് 21ന് ആരംഭിക്കുന്നത്. കേരളത്തിൽ നിന്നുള്ള ഹജ്ജ് വിമാന സർവീസുകൾ രണ്ടാം ഘട്ടത്തിലാണ്.
ജൂൺ 7 മുതൽ 22 വരെ കോഴിക്കോട്, കൊച്ചി, കണ്ണൂർ വിമാനത്താവളങ്ങളിൽ നിന്ന് ഹജ്ജ് വിമാനങ്ങൾ സർവീസ് നടത്തും. ജൂലൈ 13 മുതൽ ഇവർ മടങ്ങിത്തുടങ്ങും. ഹജ്ജ് സർവീസിനുള്ള ടെണ്ടറും കേന്ദ്ര വ്യോമയാന മന്ത്രാലയം ക്ഷണിച്ചിട്ടുണ്ട്. ഇന്ത്യൻ ഹജ്ജ് കമ്മിറ്റി വഴിയുള്ള 1,38,761 തീർഥാടകർക്കായാണ് സർവീസ്. കേരളത്തിൽ നിന്നും 13,300-ഓളം തീർഥാടകരാണ് കമ്മിറ്റി വഴി ഹജ്ജ് നിർവഹിക്കുന്നത്. കരിപ്പൂരിൽ നിന്നു മാത്രം 8300ഓളം തീർഥാടകരുണ്ട്. കേരളത്തിൽ നിന്നും ഇതുവരെ 19,025 പേരാണ് ഹജ്ജിന് അപേക്ഷിച്ചിട്ടുള്ളത്.
