52 ആമത് യുഎഇ ദേശീയ ദിനത്തോടാനുബന്ധിച്ച് ദുബായിലെ വിദ്യാർത്ഥികൾക്ക് മൂന്ന് ദിവസത്തെ അവധി പ്രഖ്യാപിച്ചു. ഡിസംബർ 2 മുതൽ 4 വരെ ദുബായിലെ സ്വകാര്യ സ്‌കൂളുകളിലും നഴ്‌സറികളിലും സർവ്വകലാശാലകളിലും ക്ലാസുകളൊന്നും ഉണ്ടായിരിക്കില്ലെന്ന് എമിറേറ്റ് വിദ്യാഭ്യാസ റെഗുലേറ്റർ നോളജ് ആൻഡ് ഹ്യൂമൻ ഡെവലപ്‌മെന്റ് അതോറിറ്റി (കെഎച്ച്ഡിഎ) വെള്ളിയാഴ്ച അറിയിച്ചു.
ഡിസംബർ 1 വെള്ളിയാഴ്ച ദുബായിലെ വിദ്യാർത്ഥികൾക്ക് ഓൺലൈൻ പഠനം ആയിരിക്കുമെന്നും കെഎച്ച്ഡിഎ വ്യക്തമാക്കി. അതേസമയം അവധി നൽകുന്നതുമായി ബന്ധപ്പെട്ട് രസകരമായ ഒരു കുറിപ്പും കെഎച്ച്ഡിഎ എക്‌സിൽ പങ്കുവച്ചിട്ടുണ്ട്.
‘അടുത്ത തിങ്കളാഴ്ച്ച നടക്കാനിരിക്കുന്ന കണക്ക് പരീക്ഷ റദ്ദാക്കാൻ അപേക്ഷിച്ചുകൊണ്ട് 10-ാം ക്ലാസിലെ ജാഡിന് ഒരു സന്ദേശം ലഭിച്ചു. അതിന് നൽകിയ ഉത്തരം ഇങ്ങനെ: അതെ, തീർച്ചയായും! ഡിസംബർ 1 വെള്ളിയാഴ്ച ഓൺലൈൻ പഠനവും ദുബായിലെ സ്വകാര്യ നഴ്‌സറികൾക്കും സ്‌കൂളുകൾക്കും യൂണിവേഴ്‌സിറ്റികൾക്കും തിങ്കളാഴ്ച ഡിസംബർ 4 വരെയും അവധിയാണ് എന്നാണ് പോസ്റ്റിൽ പറയുന്നത്. കൂടാതെ ‘have a beautiful #nationalDay Holiday. Especially you, Jad’ എന്നും എഴുതിയിട്ടുണ്ട്.
