ലോകകപ്പ് ടി20യിലെ ആവേശകരമായ മത്സരത്തിൽ നമീബിയ ഒമാനെ തോൽപ്പിച്ചു. സൂപ്പർ ഓവറിലാണ് നമീബിയയുടെ ജയം. ആദ്യം ബാറ്റ് ചെയ്ത ഒമാന് 109 റൺസ് മാത്രമേ എടുക്കാൻ ആയിരുന്നുള്ളൂ. 34 റൺസ് എടുത്ത ഖാലിദ് കെയ്ലും 22 റൺസ് എടുത്ത സീഷാനും മാത്രമാണ് ഒമാനായി കുറച്ചെങ്കിലും സംഭാവന നൽകിയത്.നമീബിയയുടെ ട്രമ്പിൽമാൻ നാലു വിക്കറ്റുകൾ വീഴ്ത്തി.
മറുപടി ബാറ്റിംഗിന് ഇറങ്ങിയ നമീബിയക്കും കാര്യങ്ങൾ എളുപ്പമായിരുന്നില്ല. ഫ്രൈലിങ്ക് 45 റൺസ് എടുത്തെങ്കിലും മറ്റാരും കാര്യമായ പിന്തുണ നൽകിയില്ല. അവസാന ഓവറിൽ അഞ്ച് റൺസായിരുന്നു ജയിക്കാൻ വേണ്ടിയിരുന്നത്. എന്നാൽ നാല് റൺസ് മാത്രമേ അവസാന ഓവറിൽ എടുക്കാനായുള്ളൂ. അവസാന പന്തൽ ജയിക്കാൻ 2 റൺ വേണ്ടപ്പോൾ ഒരു ബൈ ഓടിയാണ് കളി സൂപ്പർ ഓവറിൽ എത്തിയത്.
സൂപ്പർ ഓവറിൽ ആദ്യ ബാറ്റു ചെയ്ത നമീബിയ 21 റൺസ് എടുത്തു.4 പന്തിൽ 13 റൺസ് എടുത്ത വീസെയുടെ മികവിലായിരുന്നു മുന്നേറ്റം. വീസ തന്നെയാണ് നമീബിയക്ക് ആയി ബൗൾ ചെയ്തതും. ഒമാന് 10 റൺസ് മാത്രമാണ് എടുക്കാനായത്. ഇതോടെ നമീബിയ സൂപ്പർ ഓവർ വിജയം സ്വന്തമാക്കുകയായിരുന്നു.
