മനഷ്യക്കടത്ത് ഫലപ്രദമായി തടയുന്നതിന് ഒമാൻ പുതിയ കരട് നിയമം തയാറാക്കുന്നു. ഇതിന് വേണ്ടിയുള്ള തയ്യാറെടുപ്പുകൾ പൂർത്തിയാക്കിയതായി വിദേശകാര്യ മന്ത്രാലയം അണ്ടർ സെക്രട്ടറിയും മനുഷ്യക്കടത്തിനെതിരായ ദേശീയ സമിതി (എൻ.സി.സി.എച്ച്.ടി) ചെയർമാനുമായ ശൈഖ് ഖലീഫ അലി അൽ ഹർത്തി അറിയിച്ചു. അന്താരാഷ്ട്ര, പ്രാദേശിക വിദഗ്ധരുടെയും യു.എൻ ഡ്രഗ്സ് ആൻഡ് ക്രൈം ഓഫിസിന്റെയും (യു.എൻ.ഒ.ഡി.സി) സഹകരണത്തോടെയാണ് പുതിയ കരട് നിയമം തയ്യാറാക്കുന്നത്.
അതേസമയം ജൂലൈ 30ന് ആണ് മനുഷ്യക്കടത്തിനെതിരായ ലോക ദിനാചരണം വിവിധ പരിപാടികളോടെ ഒമാനിൽ നടക്കും. മനുഷ്യക്കടത്ത് തടയാൻ ഒമാൻ നിരന്തരമായ ശ്രമങ്ങളാണ് നടത്തിവരുന്നത്. കൂടാതെ ഈ കുറ്റകൃത്യം ഇല്ലാതാക്കാൻ പ്രത്യേക നിയമനിർമാണം അംഗീകരിച്ച ആദ്യത്തെ രാജ്യങ്ങളിൽ ഒന്ന് കൂടിയാണ് ഒമാൻ. മനുഷ്യക്കടത്ത് കുറ്റകൃത്യങ്ങളും അതുമായി ബന്ധപ്പെട്ട എല്ലാ നടപടികളും ചെറുത്ത് നിൽക്കുന്നതിൽ ഒമാൻ വളരെയധികം ശ്രദ്ധ ചെലുത്തിയിട്ടുണ്ടെന്ന് ശൈഖ് ഖലീഫ അലി അൽ ഹർത്തി പറഞ്ഞു. മനുഷ്യക്കടത്ത് തടയുന്നതുമായി ബന്ധപ്പെട്ട ആഭ്യന്തര, പ്രാദേശിക നിയമങ്ങൾ, , കൺവെൻഷനുകൾ, ഉടമ്പടികൾ എന്നിവയ്ക്ക് അനുസൃതമായി ഒമാൻ പ്രവർത്തിക്കുന്നത് തുടരുന്നുണ്ടെന്നും അദ്ദേഹം കൂട്ടിച്ചേർത്തു.
കടത്ത് തടയുന്നതിനും നിയമവാഴ്ച ഉയർത്തിപ്പിടിക്കുന്നതിനും മാനുഷിക മൂല്യങ്ങൾ സംരക്ഷിക്കുന്നതിനുമായി ദേശീയ-അന്തർദേശീയ തലങ്ങളിൽ സിവിൽ സമൂഹത്തിലെ പങ്കാളികളുമായുള്ള സഹകരണത്തിന്റെ ചട്ടക്കൂടിലാണ് ഒമാനിലെ സമിതി പ്രവർത്തിക്കുന്നത്. അതേസമയം മനുഷ്യക്കടത്തിനെ ചെറുക്കാൻ ഒമാൻ നടത്തുന്ന ശ്രമങ്ങളെ ഗൾഫ് സഹകരണ കൗൺസിലിനായുള്ള യു.എൻ.ഒ.ഡി.സി റീജിയനൽ ഓഫിസിന്റെ റീജിയനൽ പ്രതിനിധി ജഡ്ജി ഡോ. ഹതേം അലി അഭിനന്ദിച്ചു.
