കുടുംബാംഗങ്ങളെ വ്യക്തിഗത സ്പോൺസർഷിപ്പിലൂടെ സന്ദർശക വീസയിൽ ദുബായിലേക്ക് കൊണ്ടുവരുന്നതിനുള്ള ശമ്പള പരിധി ഇരട്ടിയാക്കി. 8,000 ദിർഹം മാസ ശമ്പളവും സ്വന്തം പേരിൽ താമസ സൗകര്യവും ഉള്ളവർക്ക്‌ മാത്രമേ കുടുംബാംഗങ്ങളെ സ്വന്തം സ്പോൺസർഷിപ്പിൽ രാജ്യത്തേക്ക് കൊണ്ടുവരാൻ സാധിക്കുകയുള്ളൂ.
അതേസമയം പേരക്കുട്ടികളെ സ്പോൺസർ ചെയ്യുന്നതിന് കുറഞ്ഞത് 10,000 ദിർഹമെങ്കിലും ശമ്പളം വേണം. കഴിഞ്ഞ ദിവസം മകൾക്കും പേരക്കുട്ടിക്കും വീസയ്ക്കായി അപേക്ഷിച്ച മലയാളിയുടെ അപേക്ഷ നിരസിച്ചിരുന്നു. ഇതിന് ശേഷമാണ് പുതിയ നിബന്ധനയെക്കുറിച്ച് ദുബായ് താമസ കുടിയേറ്റ വകുപ്പ് അധികൃതർ അറിയിച്ചത്. അപേക്ഷകന്റെ ശമ്പളം 8250 ദിർഹമായതിനാലാണ് പേരക്കുട്ടിയുടെ വീസ അപേക്ഷ നിരസിച്ചതെന്നും അധികൃതർ പറഞ്ഞു.
റസിഡൻസ് വീസയിൽ ഭാര്യയെയും മക്കളെയും കൊണ്ടുവരുന്നതിന് 4000 ദിർഹമാണ് ശമ്പള പരിധി നിശ്ചയിച്ചിട്ടുള്ളത്. അല്ലെങ്കിൽ 3000 ദിർഹം ശമ്പളവും സ്വന്തം പേരിൽ വീടും വേണമെന്ന നിലവിലെ നിയമത്തിൽ മാറ്റമില്ല. കൂടാതെ മാസത്തിൽ 10,000 ദിർഹം ശമ്പളവും രണ്ട് ബെഡ് റൂം ഫ്ലാറ്റും ഉണ്ടെങ്കിൽ മാതാപിതാക്കളെയും സ്പോൺസർ ചെയ്യാം.
അതേസമയം ജീവിത പങ്കാളി മരിച്ചവരോ വിവാഹമോചിതരോ ആയ സന്ദർഭങ്ങളിൽ മാതാപിതാക്കളിൽ ഒരാളെ പ്രത്യേക അനുമതിയോടെ റസിഡൻസ് വീസയിൽ കൊണ്ടുവരാമെന്ന് അധികൃതർ അറിയിച്ചു. ഒരു വർഷ കാലാവധിയുള്ള ഈ വീസ തുല്യ കാലയളവിലേക്ക്‌ പുതുക്കുകയും ചെയ്യാം. കൂടാതെ സന്ദർശക വീസയിലുള്ള കുടുംബാംഗങ്ങളെ റസിഡൻസ് വീസയിലേക്ക്‌ മാറ്റാനും അനുമതി നൽകിയിട്ടുണ്ട്. എന്നാൽ ആരോഗ്യ ഇൻഷുറൻസ് നിർബന്ധമാണ്. 18 വയസ്സിനു താഴെയുള്ളവർ മെഡിക്കൽ പരിശോധനയ്ക്കും ഹാജരാകണം. അതേസമയം കാലാകാലങ്ങളിൽ പരിഷ്കരിക്കുന്ന റസിഡൻസ് വീസ നിയമം ബാധകമായിരിക്കുമെന്നും അധികൃതർ കൂട്ടിച്ചേർത്തു.
