വിസ്മയങ്ങൾ നിറഞ്ഞതാണ് ദുബായിലെ ഗ്ലോബൽ വില്ലേജ്. സന്ദർശകർക്ക് ഒരിക്കലും മറക്കാൻ പറ്റാത്ത അനുഭവങ്ങൾ സമ്മാനിക്കുന്ന അത്ഭുത ഇടം. കുട്ടികൾക്ക് ഒരു സന്തോഷ വർത്തയുമായി എത്തിയിരിക്കുകയാണ് ദുബായിലെ ഗ്ലോബൽ വില്ലേജ്. 12 വയസ്സിന് താഴെയുള്ള കുട്ടികൾക്ക് സീസൺ 28 ന്റെ അവസാനം വരെ മൾട്ടി കൾച്ചറൽ പാർക്കിലേക്ക് പ്രവേശനം സൗജന്യമായിരിക്കുമെന്ന് അധികൃതർ പറഞ്ഞു. നിലവിലെ സീസൺ അവസാനിക്കുന്നതിന് മുമ്പ് ഗ്ലോബൽ വില്ലേജ് സന്ദർശിക്കാൻ കുടുംബങ്ങളെ പ്രോത്സാഹിപ്പിക്കുന്നതിന്റെ ഭാഗമായാണിത്.
ഏപ്രിൽ 28 നാണ് സീസൺ അവസാനിക്കുന്നത്. അടുത്ത സീസൺ ഒക്ടോബറിലാണ് തുടങ്ങുക. നിലവിലെ സീസണിൽ പാർക്കിൽ പ്രവേശിക്കാൻ രണ്ട് തരം ടിക്കറ്റുകളാണുള്ളത്. ഞായർ മുതൽ വ്യാഴം വരെയുള്ള ടിക്കറ്റും വാരാന്ത്യങ്ങളും പൊതു അവധി ദിനങ്ങളും ഉൾപ്പെടെ ആഴ്ചയിലെ ഏത് ദിവസവും സന്ദർശകർക്ക് ഉപയോഗിക്കാൻ പറ്റുന്ന ‘എനി ഡേയ്’ ടിക്കറ്റുകളുമാണിവ. കൂടാതെ, മൂന്ന് വയസ്സിന് താഴെയുള്ള കുട്ടികൾക്കും 65 വയസും അതിനു മുകളിൽ പ്രായമുള്ള മുതിർന്ന പൗരന്മാർക്കും നിശ്ചയദാർഢ്യമുള്ളവർക്കും ടിക്കറ്റുകൾ സൗജന്യമാണ്.
