ബലിപെരുന്നാൾ ആഘോഷിക്കാൻ കുട്ടികൾക്കായി ഇതാ വമ്പൻ ഓഫർ. പെരുന്നാളിന്റെ ഭാഗമായി കുട്ടികൾക്ക് ടെറയുടെ ഇൻഡോർ പ്ലേ ഏരിയയും ടാക്ക ദ്വീപും ഉൾപ്പെടെ ദുബായിലെ എക്സ്പോ സിറ്റിയിലെ എല്ലാ പവലിയനുകളിലേക്കും സൗജന്യ പ്രവേശനമാണ് അനുവദിച്ചിരിക്കുന്നത്. 12 വയസും അതിൽ താഴെയും പ്രായമുള്ള കുട്ടികൾക്കാണ് ഈ ഓഫർ ഒരുക്കിയിരിക്കുന്നത്.
അതേസമയം, മുതിർന്നവർക്ക് 50 ദിർഹത്തിന് പവലിയൻ ടിക്കറ്റോ 120 ദിർഹത്തിന് ആകർഷണങ്ങളുടെ പാസോ വാങ്ങാനും സാധിക്കും. എല്ലാ സന്ദർശകർക്കും തിരഞ്ഞെടുത്ത ഡൈനിംഗ് ഓപ്ഷനുകളിൽ 20 ശതമാനം കിഴിവും ഈ കാലയളവിൽ ലഭ്യമാക്കിയിട്ടുണ്ട്. ഗവൺമെൻ്റിൻ്റെ പൊതു അവധി ദിവസങ്ങളുടെ പട്ടിക പ്രകാരം യുഎഇ നിവാസികൾക്ക് അറഫ ദിനത്തിന് ഒരു ദിവസവും ഈദ് അൽ അദ്ഹയ്ക്ക് മൂന്ന് ദിവസത്തെ അവധിയുമാണ് ലഭിക്കുക.
വേനൽക്കാലത്തെ എക്സ്പോ സിറ്റിയുടെ പ്രവർത്തന സമയത്തിൽ അധികൃതർ മാറ്റം വരുത്തിയിട്ടുണ്ട്. ജൂൺ 15 മുതൽ സെപ്റ്റംബർ 15 വരെ, ടെറ, അലിഫ്, വിഷൻ, വിമൻസ് പവലിയനുകൾ, കൂടാതെ എക്സ്പോ 2020 ദുബായ് മ്യൂസിയം, സ്‌റ്റോറീസ് ഓഫ് നേഷൻസ് എക്‌സിബിഷനുകൾ എന്നിവ തിങ്കൾ മുതൽ വെള്ളി വരെയുള്ള ദിവസങ്ങളിൽ ഉച്ചയ്ക്ക് 12 മുതൽ രാത്രി 8 വരെയും വാരാന്ത്യങ്ങളിൽ രാവിലെ 10 മുതൽ രാത്രി 8 വരെയും പ്രവർത്തിക്കും. ഗാർഡൻ ഇൻ ദി സ്കൈ, റാഷിദിൻ്റെയും ലത്തീഫയുടെയും കളിസ്ഥലങ്ങൾ എല്ലാ ദിവസവും വൈകിട്ട് 5 മുതൽ 10 വരെയുമാണ് തുറന്നിരിക്കുക.
ഒക്ടോബർ 1 വരെ അൽ വാസൽ ഡോമിൻ്റെ പ്രൊജക്ഷനും ജലവും ഊർജവും സംരക്ഷിക്കുന്നതിനായുള്ള സർറിയൽ വാട്ടർ ഫീച്ചർ ജൂലൈ 1 മുതൽ സെപ്റ്റംബർ 15 വരെയും അടച്ചിടും. ജൂലൈ 1 മുതൽ ഓഗസ്റ്റ് 15 വരെ വാർഷിക അറ്റകുറ്റപ്പണികൾക്കായി ഗാർഡൻ ഇൻ സ്കൈയും അടച്ചിടും.
