സൂര്യ ആരാധകർ ആവേശത്തോടെ കാത്തിരിക്കുന്ന ബിഗ് ബജറ്റ് ചിത്രമായ ‘കങ്കുവ’യുടെ റിലീസ് തിയതി പ്രഖ്യാപിച്ചു. നവംബർ 14-നാണ് ചിത്രം തിയേറ്ററുകളിലേയ്ക്ക് എത്തുന്നത്. സൂര്യയുടെ അഭിനയ ജീവിതത്തിലെ ഏറ്റവും വലിയ ചിത്രമാണ് സിരുത്തൈ ശിവ സംവിധാനം ചെയ്യുന്ന കങ്കുവ.
1,000 വർഷങ്ങൾക്ക് മുമ്പുള്ള കഥയാണ് സിനിമയുടെ പ്രമേയം. രണ്ടു കാലഘട്ടങ്ങളിലെ കഥാപാത്രങ്ങളെ ആണ് നടൻ സിനിമയിൽ അവതരിപ്പിക്കുക. അതിനാൽ താരം എത്തുന്ന രണ്ട് ഗെറ്റപ്പുകൾ കാണാൻ ആകാംക്ഷയിലാണ് ആരാധകർ. പീരിയഡ് ഡ്രാമ വിഭാഗത്തിലുള്ള സിനിമ 38 ഭാഷകളിലായാണ് റിലീസ് ചെയ്യുന്നത്. 3ഡിക്ക് പുറമെ 2ഡിയിലും ഐമാക്സ് സ്ക്രീനുകളിലും കങ്കുവ റിലീസ് ചെയ്യുന്നുണ്ട്.
ബോളിവുഡ് താരം ദിഷ പഠാണി ചിത്രത്തിലെ നായികാ കഥാപാത്രത്തെ അവതരിപ്പിക്കുമ്പോൾ ബോബി ഡിയോളാണ് കങ്കുവയിൽ വില്ലൻ വേഷത്തിലെത്തുന്നത്. 350 കോടിയാണ് ചിത്രത്തിന്റെ ബജറ്റ്. കേരളത്തിൽ കങ്കുവ വിതരണത്തിന് എത്തിക്കുന്നത് ഗോകുലം മൂവിസ് ആണ്.
