തൃശൂർ നാട്ടികയിൽ അഞ്ച് പേരുടെ മരണത്തിനിടയാക്കിയ ലോറിയപകടത്തിൽ ഡ്രൈവർക്കും ക്ലീനർക്കുമെതിരെ കേസെടുത്തു. ആലക്കോട് സ്വദേശികളായ ബെന്നിക്കും അലക്‌സിനുമെതിരെയാണ് കൊലക്കുറ്റത്തിന് പൊലീസ് കേസെടുത്തത്.
ഇന്ന് പുലർച്ചെയായിരുന്നു അപകടം. റോഡരികിൽ ഉറങ്ങികിടക്കുകയായിരുന്ന നാടോടി കുടുംബത്തിലെ രണ്ട് കുട്ടികൾ ഉൾപ്പെടെ അഞ്ചുപേരാണ് കൊല്ലപ്പെട്ടത്. പാലക്കാട് ഗോവിന്ദാപുരം ചെമ്മണംതോട് സ്വദേശികളാണ് അപകടത്തിൽപെട്ടത്. ഡ്രൈവിങ് ലൈസൻസില്ലാത്ത ക്ലീനർ അലക്‌സാണ് അപകട സമയത്ത് വാഹനമോടിച്ചത്. ഈ സമയത്ത് ഡ്രൈവറും ക്ലീനറും മദ്യലഹരിയിലായിരുന്നു.
അപകടത്തിന് ശേഷം വാഹനം നിർത്താതെ പോയ ഇവരെ നാട്ടുകാരാണ് പിടികൂടിയത്. ഡ്രൈവറുടെ ലൈസൻസും വാഹനത്തിൻ്റെ രജിസ്ട്രേഷനും സസ്പെൻഡ് ചെയ്യുമെന്ന് ഗതാഗതമന്ത്രി പറഞ്ഞു. അതോടൊപ്പം വരും ദിവസങ്ങളിൽ ട്രക്കുകൾ ഓടിക്കുന്നവരെ കേന്ദ്രീകരിച്ചും ലൈൻ ട്രാഫിക് ലംഘിക്കുന്നവരുമായി ബന്ധപ്പെട്ടും രാത്രിയിൽ പ്രത്യേക പരിശോധന നടത്തുമെന്നും മന്ത്രി അറിയിച്ചു.
