തിയേറ്ററിൽ വെറും 99 രൂപയ്ക്ക് സിനിമ കാണാം എന്ന് പറഞ്ഞാൽ നിങ്ങൾക്ക് വിശ്വസിക്കാൻ സാധിക്കുമോ? എങ്കിൽ വിശ്വസിച്ചേ മതിയാകൂ. കാരണം, ഇന്ന് (സെപ്റ്റംബർ 20) ഇന്ത്യയിലെവിടെയുമുള്ള തിയേറ്ററിൽ 99 രൂപയ്ക്ക് സിനിമാ ടിക്കറ്റ് ബുക്ക് ചെയ്യാം. ദേശീയ സിനിമാ ദിനത്തിന്റെ ഭാഗമായി മൾട്ടി പ്ലെക്‌സ് ആസോസിയേഷൻ ഓഫ് ഇന്ത്യയാണ് പ്രേക്ഷകർക്ക് പ്രത്യേക ഓഫർ നൽകിയിരിക്കുന്നത്.
മൾട്ടിപ്ലെക്സ് അസോസിയേഷന് കഴിലുള്ള പിവിആർ ഐനോക്സ്, സിനിപോളിസ്, മിറാഷ്, വേവ്, എം2കെ, ഡിലൈറ്റ്, ഏഷ്യൻ, മുക്‌ത എ 2, മൂവി ടൈം തുടങ്ങിയ മൾട്ടിപ്ലെക്സ് ശൃംഖലകളിലാണ് ഓഫർ ലഭ്യമാവുക. ഇന്ന് ഏത് സമയത്ത് ടിക്കറ്റ് ബുക്ക് ചെയ്താലും ഈ ഓഫർ ലഭിക്കും. ബുക്കിങ് ആപ്പുകളിൽ 99 രൂപയ്ക്ക് പുറമേ അധിക ബുക്കിങ് ചാർജ് ഉണ്ടായിരിക്കും. എന്നാൽ തിയേറ്ററുകളിലെ കൗണ്ടറുകളിൽ 99 രൂപയ്ക്ക് ടിക്കറ്റ് എടുക്കാൻ സാധിക്കും.
ബുക്ക്‌മൈഷോ, പേടിഎം തുടങ്ങിയ സിനിമ ബുക്കിങ് ആപ്പുകളിൽ ഓഫർ തുകയ്ക്ക് ഇതിനോടകം ടിക്കറ്റ് ലഭ്യമായിത്തുടങ്ങിയിട്ടുണ്ട്. എന്നാൽ ത്രിഡി സിനിമകൾ, ഐമാക്‌സ്, 4 ഡിഎക്സ്, റിക്ലൈനർ തുടങ്ങിയ പ്രീമിയം വിഭാഗങ്ങൾക്ക് ഈ ഓഫർ ലഭ്യമായിരിക്കില്ല.
