ആടുജീവിതത്തിലെ ഗാനം കേരള ക്രിക്കറ്റ് ലീഗ് ടീമായ കൊച്ചി ബ്ലൂ ടൈഗേഴ്സ് അനുവാദമില്ലാതെ ഉപയോഗിച്ചുവെന്ന് സിനിമയുടെ നിർമ്മാതാക്കൾ. ചിത്രത്തിൽ എ.ആർ റഹ്മാൻ സംഗീതം നൽകിയ ‘ഹോപ്’ എന്ന പ്രൊമോ ഗാനം കൊച്ചി ബ്ലൂ ടൈഗേഴ്സ് ടീമിന്റെ പ്രചാരണത്തിനായി ഉപയോഗിച്ചുവെന്നാണ് പരാതി. ഇതുമായി ബന്ധപ്പെട്ട് നിയമ നടപടിക്കൊരുങ്ങുകയാണ് നിർമ്മാതാക്കളായ വിഷ്വൽ റൊമാൻസ്.
കൊച്ചി ബ്ലൂ ടൈഗേഴ്സ് ടീമിന്റെ ഉടമയായ സുബാഷ് ജോർജിൻ്റെ കമ്പനിക്ക് തങ്ങൾ ഗാനത്തിൻ്റെ അവകാശം കൈമാറിയിട്ടുണ്ടെങ്കിലും അത് എഡിറ്റ് ചെയ്യാനോ റീമിക്‌സ് ചെയ്‌ത് മറ്റ് ആവശ്യങ്ങൾക്ക് ഉപയോഗിക്കാനോ അനുമതി നൽകിയിട്ടില്ലെന്നാണ് ആടുജീവിതത്തിന്റെ നിർമ്മാതാക്കൾ പറയുന്നത്. ഗാനം ഉപയോഗിക്കാൻ അനുവാദമില്ലെന്ന് കാണിച്ച് കേരള ക്രിക്കറ്റ് അസോസിയേഷൻ വിഷ്വൽ റൊമാൻസ് നോട്ടീസ് അയച്ചിട്ടുണ്ട്.
കൊച്ചി ബ്ലൂ ടൈഗേഴ്സ് തങ്ങളുടെ ഔദ്യോഗിക ഗാനം എന്ന നിലയിലാണ് ഹോപ് ആന്തം പുറത്തിറക്കിയത്. ആടുജീവിതം സിനിമയുടെ പ്രമോഷൻ്റെ ഭാഗമായി നിരവധി ഭാഷകളിൽ പുറത്തിറങ്ങിയ ആൽബത്തിൻ്റെ മലയാളം പതിപ്പാണ് ഇപ്പോൾ കൊച്ചി ബ്ലൂ ടൈഗേഴ്സിന്റെ ഔദ്യോഗിക ഗാനമായി പുറത്തിറക്കിയത്. ഇതാദ്യമായാണ് മലയാളം പതിപ്പ് മാത്രമായി പുറത്തിറക്കുന്നത്. ഹിന്ദി, തമിഴ്, തെലുങ്ക്, ഇംഗ്ലീഷ് പതിപ്പുകൾ ഉടൻ റിലീസ് ചെയ്യുമെന്ന് ടീം ഉടമ സുഭാഷ് മാനുവൽ പറഞ്ഞിരുന്നു.
