മലയാളികൾക്ക് മറക്കാനാകുമോ അന്തരിച്ച ഗായിക രാധിക തിലകിനെ. രാധിക തിലകിൻറെ മകൾ ദേവിക വിവാഹിതയായി. ബംഗളൂരു സ്വദേശി അരവിന്ദ് സുചിന്ദ്രൻ ആണ് ദേവികയുടെ വരൻ.
ദേവിക ബംഗളൂരുവിലാണ് ജോലി ചെയ്യുന്നത്. അഭിഭാഷകനായി ജോലി ചെയ്യുകയാണ് അരവിന്ദ്. ബംഗളൂരൂവിൽ നടന്ന വിവാഹച്ചടങ്ങിൽ അടുത്ത ബന്ധുക്കളും സുഹൃത്തുക്കളും മാത്രമാണ് പങ്കെടുത്തത്. ഗായിക സുജാത മോഹൻറെ അടുത്ത ബന്ധുവാണ് രാധിക തിലക്. ചടങ്ങിലുടനീളം സുജാതയും മകൾ ശ്വേതയുമടക്കമുള്ള കുടുംബാംഗങ്ങൾ പങ്കെടുത്തിരുന്നു. 25ന് കൊച്ചിയിൽ ഭാസ്കരീയം കൺവെൻഷൻ സെന്ററിൽ വച്ചു വിവാഹ വിരുന്ന് നടക്കും. അർബുദത്തെ തുടർന്ന് ചികിത്സയിൽക്കഴിയവെ 2015 സെപ്റ്റംബർ 20നാണ് രാധിക തിലക് വിടവാങ്ങിയത്.
‘എന്റെ പ്രിയപ്പെട്ട രാധികയുടെ മകൾ. ഈ നവദമ്പതികളെ നിങ്ങൾ ആശീർവദിക്കൂ’ എന്ന അടിക്കുറിപ്പോടെ സുജാത നവ ദമ്പതികളുടെ ചിത്രങ്ങൾ സോഷ്യൽ മീഡിയയിൽ പങ്കുവെച്ചിട്ടുണ്ട്. വിവാഹ ചടങ്ങുകൾ നടക്കുന്നതിനിടെ സുജാതയും മകൾ ശ്വേതയും ഒരുമിച്ച് പ്രാർഥനാമംഗള ഗാനവും ആലപിച്ചു. അനിയത്തിയുടെ അപ്രതീക്ഷിത വേർപാട് ഏൽപ്പിച്ച ആഘാതത്തിൽ നിന്നും താനും കുടുംബവും ഇപ്പോഴും കരകയറിയിട്ടില്ലെന്ന് പല വേദികളിലും സുജാത പറഞ്ഞിട്ടുണ്ട്.
