കേരള സർക്കാരിനെതിരെ രൂക്ഷമായ വിമർശനമുന്നയിച്ച് കേന്ദ്രമന്ത്രി വി.മുരളീധരൻ. വനം എന്തെന്നറിയാത്ത വനംമന്ത്രിയും സാമ്പത്തികശാസ്ത്രം എന്തെന്നറിയാത്ത ധനമന്ത്രിയുമാണ് കേരളം ഭരിക്കുന്നതെന്നും ജനങ്ങളുടെ ജീവന് സംരക്ഷണം ഉറപ്പാക്കാൻ കഴിയാത്ത വനം മന്ത്രിയെ പുറത്താക്കണമെന്നും വി.മുരളീധരൻ ആവശ്യപ്പെട്ടു.
വയനാട്ടിൽ ആനയുടെ ആക്രമണത്തിൽ ഒരാൾ കൊല്ലപ്പെട്ട സാഹചര്യത്തിൽ അറ്റിങ്ങലിൽ വെച്ചായിരുന്നു മന്ത്രിയുടെ പ്രതികരണം. “നികുതിദായകരുടെ പണം കൊണ്ട് എ.കെ ശശീന്ദ്രനെപ്പോലുള്ളവരെ തീറ്റിപ്പോറ്റേണ്ട കാര്യമില്ല. കർണാടക സർക്കാർ റേഡിയോ കോളർ ഘടിപ്പിച്ചിരുന്ന ആനയായിട്ട് പോലും മുന്നറിയിപ്പ് നൽകാൻ വനംവകുപ്പിന് കഴിയാതിരുന്നത് ഗുരുതര വീഴ്ച‌യാണ്. ആനയെ മുഖ്യമന്ത്രിയുടെ ഓഫീസ് നോക്കുന്നുണ്ടെന്ന വിചിത്രമായ വാദമാണ് എ.കെ ശശീന്ദ്രൻ ഉന്നയിക്കുന്നത്.
വന്യജീവി ആക്രമണം നേരിടാൻ കേന്ദ്രം നൽകുന്ന പണം എവിടെപ്പോയെന്നും പ്രൊജക്ട് എലിഫെൻ്റ് പദ്ധതി എന്തായെന്നും സർക്കാർ പറയണം. വൈദ്യുതി വേലി കെട്ടുന്നതിനോ വനത്തിൽ ഭക്ഷണം എത്തിക്കുന്നതിനോ എന്തെങ്കിലും പദ്ധതി സ്വീകരിച്ചിട്ടുണ്ടോയെന്ന് വ്യക്തമാക്കണം. മോദിവിരുദ്ധ സമരത്തിന് കേരള-കർണാടക വനം മന്ത്രിമാർ ഒരേസമയം ഡൽഹിയിൽ ഉണ്ടായിരുന്നു. ഈ വിഷയത്തിൽ എന്തെങ്കിലും ചർച്ച നടത്തിയിരുന്നുവെങ്കിൽ ജനങ്ങൾക്ക് പ്രയോജനം ലഭിക്കുമായിരുന്നു. മോദിക്കെതിരെ സമരം ചെയ്യുന്ന സമയത്ത് കേരളത്തിലെ ജനങ്ങളുടെ താത്പര്യം സംരക്ഷിക്കാനായിരുന്നു സർക്കാർ ശ്രമിക്കേണ്ടിയിരുന്നത്” എന്നും മന്ത്രി കുറ്റപ്പെടുത്തി.
