63 വയസ്സിന്റെ നിറവിൽ ദുബായ് രാജ്യാന്തര വിമാനത്താവളം. ലോകത്തിന്റെ നെറുകയിലേക്ക്‌ ഉയർന്ന വിമാനത്താവളത്തിന്റെ ചരിത്രം ലോക രാജ്യങ്ങൾക്ക് പ്രചോദനം നൽകുന്നതാണ്. 1960 സെപ്റ്റംബർ 30ന് ശൈഖ് റാഷിദ് ബിൻ സഈദ് അൽ മക്തൂമാണ് വിമാനത്താവളം ഉദ്ഘാടനം ചെയ്തത്. ലബനൻ എയർലൈൻസിന്റെ മിഡിൽഈസ്റ്റ് വിമാനമാണ് ദുബായ് വിമാനത്താവളത്തിൽ കന്നിപ്പറക്കൽ നടത്തിയത്. ഈ ചരിത്ര നിമിഷം കാണാൻ കാറിലും ബസിലും കുതിരപ്പുറത്തും ഒട്ടകപ്പുറത്തുമായി എത്തിയത് 3000 പേരാണ്.
അതേസമയം അന്നത്തെ ചെറിയ എയർപോർട്ടിൽ നിന്ന് ഇന്നു വിമാനത്താവളങ്ങളുടെ ആസ്ഥാന കേന്ദ്രമായി ദുബായ് മാറിയിരിക്കുകയാണ്. മരുഭൂമിയുടെ മധ്യത്തിൽ ചെറിയ സൗകര്യങ്ങളിൽ തുടങ്ങിയ വിമാനത്താവളം നാൾക്കുനാൾ നവീന സൗകര്യങ്ങളോടെ വളർന്നു. 1966ൽ രാത്രി വിമാനം ഇറങ്ങാനുള്ള സംവിധാനമായി. നിരീക്ഷണ ടവറോടു കൂടി മൂന്ന് നില കെട്ടിടം അന്നത്തെ ഭരണാധികാരി ശൈഖ് റാഷിദ് ബിൻ സഈദ് അൽ മക്തൂം തുറന്നു.
1970ൽ യാത്രക്കാരുടെ എണ്ണം 5.24 ലക്ഷമായി ഉയർന്നു. 1997ൽ ദുബായ് എയർപോർട്ട് വൻകിട വിമാനത്താവളങ്ങളുടെ ക്ലബ്ബിൽ രാജ്യാന്തര പദവിയിലെത്തുകയും ചെയ്തു. കൂടാതെ ജനപ്പെരുപ്പം കൊണ്ട് കുതിക്കുന്ന 10 വിമാനത്താവളങ്ങളുടെ പട്ടികയിൽ ആറാമതെത്തുകയും ചെയ്തു. വിമാനത്താവളം ആരംഭിച്ച് ഒരു വർഷത്തിനകം 1961ൽ 42,852 പേർ എത്തി. പിന്നീടുള്ള ഓരോ വർഷവും യാത്രക്കാർ വർധിച്ചു വന്നു. പിന്നീട് 2019 ആയപ്പോഴേക്കും വർഷത്തിൽ 8.6 കോടിയിലേറെ പേർ എത്തി. യാത്രക്കാരുടെ വർധനവ് അനുസരിച്ച് ലോകോത്തര സൗകര്യം ഒരുക്കിയാണ് ദുബായ് ആഗോള ജനതയെ വരവേൽക്കുന്നത്.
