ഏകദിന ലോകകപ്പ് മത്സരത്തിന് വേണ്ടിയുള്ള ഇന്ത്യൻ ടീമിൽ എടുത്തില്ലെങ്കിലും ഇന്ത്യയുടെ വിജയത്തിനു വേണ്ടി ക്ഷേത്രത്തിലെത്തി പ്രാർഥിച്ച് വെറ്ററൻ താരം ശിഖർ ധവാൻ. ഉജ്ജയിനിലെ മഹാകാലേശ്വർ ക്ഷേത്രത്തിൽ എത്തിയാണ് ധവാന്‍ ഇന്ത്യൻ ടീം ലോകകപ്പ് ജയിക്കുന്നതിന് വേണ്ടി പ്രാർഥിച്ചത്. ധവാനൊപ്പം ബോളിവുഡ് താരം അക്ഷയ് കുമാറും പ്രാ‍ർഥനയിൽ പങ്കെടുത്തു. ക്ഷേത്രത്തില്‍ നിന്നുള്ള ദൃശ്യങ്ങൾ ഇപ്പോൾ സമൂഹമാധ്യമത്തിൽ വൈറലാണ്.
ഏകദിന ലോകകപ്പ്,ഏഷ്യാ കപ്പ്,ഏഷ്യൻ ഗെയിംസ് ടീമുകളിലൊന്നും തന്നെ ശിഖർ ധവാനെ ബിസിസിഐ പരിഗണിച്ചിരുന്നില്ല. എന്നാൽ.ഏഷ്യൻ ഗെയിംസിലേക്കു കൂടി പരിഗണിക്കാതിരുന്നതോടെ താൻ ഞെട്ടിപ്പോയതായി ധവാന്‍ തന്നെ അടുത്തിടെ പ്രതികരിച്ചിരുന്നു. ഇന്ത്യൻ ടീമിലേക്കു തിരിച്ചെത്താൻ ആഗ്രഹിക്കുന്നതായും ധവാൻ കൂട്ടിച്ചേർത്തിരുന്നു.
ഇന്ത്യ, ലോകകപ്പ് ജയിക്കണമെന്നാണ് എല്ലാവരും ആഗ്രഹിക്കുന്നത്. അത് തന്നെയാണ് ഞാനും പ്രാർഥിച്ചത്. അതേസമയം ധവാൻ മികച്ച താരമാണെന്നും എന്നാൽ ടീമിലെടുക്കാൻ ബുദ്ധിമുട്ടുണ്ടെന്നും സിലക്ഷൻ കമ്മിറ്റി തലവൻ അജിത് അഗാർക്കർ അടുത്തിടെ പറഞ്ഞത് വിവാദമായിരുന്നു.
