നടനും ഡിഎംഡികെ സ്ഥാപകനുമായ വിജയകാന്തിന് അന്ത്യാഞ്ജലി അർപ്പിച്ച് വിജയ്. ചെന്നൈയിലെ ഡിഎംഡികെ കാര്യാലയത്തിൽ വിജയകാന്തിന്റെ ഭൗതിക ശരീരം പൊതുദർശനത്തിന് വെച്ചപ്പോഴാണ് വികാരാധീനനായി വിജയ് എത്തി അന്ത്യാഞ്ജലി അർപ്പിച്ചത്.
ഭൗതികശരീരത്തിന് മുന്നിൽ കൈകൂപ്പി പ്രാർത്ഥനയോടെ നിന്ന വിജയ് നിറകണ്ണുകളോടെയാണ് മടങ്ങിയത്. പ്രിയപ്പെട്ട ഒരാൾ വിടപറയുന്നതിൻ്റെ വേദന വിജയിയു മുഖത്ത് പ്രകടമായിരുന്നു. വിജയകാന്തിന്റെ ഭാര്യ പ്രേമലത ഉൾപ്പെടെയുള്ള കുടുംബാംഗങ്ങങ്ങളെ വിജയ് ആശ്വസിപ്പിക്കുകയും ചെയ്തു.
വിജയിയും വിജയകാന്തും തമ്മിൽ പതിറ്റാണ്ടുകൾ നീണ്ട ആത്മബന്ധമുണ്ട്. വിജയിയുടെ പിതാവ് എസ്.എ ചന്ദ്രശേഖർ സംവിധാനം ചെയ്ത ചിത്രങ്ങളിലായിരുന്നു തുടക്ക കാലത്ത് വിജയകാന്ത് കൂടുതലായും അഭിനയിച്ചത്. കൂടാതെ എസ്.എ ചന്ദ്രശേഖറിൻ്റെ സംവിധാനത്തിൽ വിജയകാന്ത് നായകനായ വെട്രി എന്ന ചിത്രത്തിലൂടെയാണ് ബാലതാരമായി വിജയ് സിനിമയിലേയ്ക്ക് അരങ്ങേറിയത്. നടൻ വിജയകാന്തിന് ആദരാഞ്ജലി അർപ്പിക്കൻ സിനിമാലോകവും ആരാധകരും ഡിഎംഡികെ കാര്യാലയത്തിലേയ്ക്ക് എത്തിക്കൊണ്ടിരിക്കുകയാണ്.
