സർവകലാശാല വൈസ് ചാന്‍സലര്‍മാരോട് രാജിവയ്ക്കാന്‍ ഗവര്‍ണര്‍ നിര്‍ദ്ദേശിച്ച അന്ത്യശാസനത്തിന്‍റെ സമയം രാവിലെ 11.30ന് അവസാനിച്ചെങ്കിലും ആരും രാജിവച്ചില്ല. നിയമ നടപടി സ്വീകരിക്കുമെന്ന് ആറ് വിസി മാര്‍ രാജ്ഭവനെ അറിയിക്കുകയും ചെയ്തിട്ടുണ്ട്. ഇത്തരത്തിലുള്ള അസാധാരണ സാഹചര്യം കണക്കിലെടുത്ത് ഹൈക്കോടതി ഇന്ന് വൈകിട്ട് 4.30ന് സപെഷ്യല്‍ സിറ്റിംഗ് നടത്തും. ദീപാവലി പ്രമാണിച്ച് ഇന്ന് കോടതി അവധിയാണെങ്കിലും വിഷയം ഇന്ന് തന്നെ പരിഗണിക്കാന്‍ ചീഫ് ജസ്റ്റിസ് നിര്‍ദ്ദേശിക്കുകയായിരുന്നു. ജസ്റ്റിസ് ദേവന്‍ രാമചന്ദ്രന്‍റെ ബഞ്ച് വിസി മാരുടെ ഹര്‍ജി പരിഗണിക്കും.
വി സി സ്ഥാനത്ത് തുടരാൻ അനുവദിക്കണമെന്നാണ് ഹൈക്കോടതിയിലെ ഹര്‍ജിയില്‍ ഇവരുടെ ആവശ്യം.ഗവർണറുടെ നോട്ടീസ് നിയമപരമല്ലാത്തതിനാൽ സ്റ്റേ ചെയ്യണം. കാരണം കാണിക്കൽ നോട്ടീസ് നൽകി അന്വേഷണം നടത്തിയാലേ നടപടിയെടുക്കാൻ സാധിക്കൂവെന്നും ഗുരുതമായ ചട്ടലംഘനമോ പെരുമാറ്റദൂഷ്യമോ ഉണ്ടായാൽ മാത്രമേ വി.സിമാരെ പുറത്താക്കാൻ സാധിക്കൂവെന്നും ഹർജിയിൽ വാദം ഉന്നയിച്ചിട്ടുണ്ട്.
