വനിതാ ഫുട്ബോൾ ലോകകപ്പിൽ ഇറ്റലിയോട് പരാജയം സമ്മതിച്ച് അർജൻ്റീന. എതിരില്ലാത്ത ഒരു ഗോളിനാണ് ഇറ്റലി അർജന്റീനയെ പരാജയപ്പെടുത്തിയത്. ഗ്രൂപ്പ് ജിയിൽ നടന്ന മത്സരം അവസാനിക്കാൻ മൂന്ന് മിനിറ്റ് മാത്രം ശേഷിക്കേ ക്രിസ്റ്റീന ജിറെല്ലിയാണ് ഇറ്റലിയുടെ ജയം ഉറപ്പിച്ചത്.
അത്ഭുതപ്പെടുത്തുന്ന ഗോളോടെയായിരുന്നു ക്രിസ്റ്റീന ജിറെല്ലി ഇറ്റലിയുടെ രക്ഷകയായത്. 83-ാം മിനിറ്റിൽ പകരക്കാരിയായി കളത്തിലിറങ്ങി നാല് മിനിറ്റുകൾക്കുള്ളിലായിരുന്നു ജിറെല്ലിയുടെ ഗോൾ. ഇടതുവിങ്ങിൽ നിന്ന് ലിസ ബോട്ടിൻ നൽകിയ ക്രോസ് ഒരു ഹെഡറിലൂടെ നിസാരമായി ജിറെല്ലി വലയിൽ വീഴ്ത്തുകയായിരുന്നു.
ഇത്തവണ ഇറ്റലിയോട് പരാജയം സമ്മതിച്ചതോടെ വനിതാ ഫുട്ബോൾ ലോകകപ്പിന്റെ ചരിത്രത്തിൽ അർജന്റീന വീണ്ടും തലകുനിക്കേണ്ടി വന്നു. ഇതുവരെ 10 മത്സരങ്ങൾ മാത്രം കളിച്ച അർജന്റീനയ്ക്ക് ഇതുവരെ ഒരു കളിയിൽ പോലും വിജയിക്കാൻ സാധിച്ചിട്ടില്ല. രണ്ട് മത്സരങ്ങൾ സമനിലയായപ്പോൾ എട്ട് മത്സരങ്ങളിലും പരാജയം ഏറ്റുവാങ്ങേണ്ടിവന്നു.
