2024 ജനുവരിയിൽ ദോഹയിൽ നടക്കുന്ന എഎഫ്സി ഏഷ്യൻ കപ്പ് 2023-ന്റെ ടിക്കറ്റ് വിൽപന ആരംഭിച്ചു. ഘട്ടം ഘട്ടമായി പൂർണമായും ഓൺലൈൻ വഴിയാണ് ടിക്കറ്റ് വിൽപന. നാല് വിഭാഗങ്ങളിലായാണ് ടിക്കറ്റുകൾ ലഭ്യമാക്കുക. 25 റിയാൽ മുതലാണ് ടിക്കറ്റ് നിരക്ക്. ക്രെഡിറ്റ്-ഡെബിറ്റ് കാർഡ്, ഗൂഗിൾ പേ, ആപ്പിൾ പേ എന്നിവ മുഖേന ഓൺലൈനിൽ പേമെന്റ് നടത്താം. അംഗപരിമിതിയുള്ളവർക്ക് 4 വിഭാഗങ്ങളിലും അക്സസിബിലിറ്റി ടിക്കറ്റുകളും ലഭിക്കും.
ടിക്കറ്റെടുത്തവർക്ക് റീ-സെയിൽ ചെയ്യണമെങ്കിൽ ടൂർണമെന്റിന്റെ ഔദ്യോഗിക ടിക്കറ്റ് റീ-സെയിൽ പ്ലാറ്റ്ഫോം വഴി വിൽക്കാനും സാധിക്കും. കൂടാതെ ഏഷ്യൻ കപ്പിൽ ഹയാ കാർഡ് ഉണ്ടായിരിക്കില്ലെന്ന് അധികൃതർ അറിയിച്ചു. ജനുവരി 12 മുതൽ ഫെബ്രുവരി 10 വരെയാണ് ഏഷ്യൻ കപ്പ് നടത്തപ്പെടുന്നത്. 9 സ്റ്റേഡിയങ്ങളിലായി 24 ടീമുകൾ മാറ്റുരയ്ക്കുന്ന 51 മത്സരങ്ങളാണ് നടക്കുന്നത്. ലുസെയ്ൽ സ്റ്റേഡിയത്തിലാണ് ഉദ്ഘാടന – ഫൈനൽ മത്സരങ്ങൾ സംഘടിപ്പിക്കുന്നത്. ടിക്കറ്റുകൾ http://tickets.qfa.ga/afc2023 എന്ന വെബ്സൈറ്റിൽ നിന്നും ലഭ്യമാണ്.
