ഫുട്ബോൾ ഇതിഹാസം ക്രിസ്റ്റ്യാനോ റൊണാൾഡോയുടെ വാച്ച് പ്രേമം ലോകപ്രശസ്തമാണ്. ഇപ്പോൾ പുതിയൊരു ആഡംബര വാച്ച് സ്വന്തമാക്കിയിരിക്കുകയാണ് താരം. താരം തന്നെയാണ് വാച്ചിന്റെ ദൃശ്യങ്ങൾ ഉൾപ്പെടെ ഇക്കാര്യം തന്റെ ആരാധകരുമായി പങ്കിട്ടത്.
ജേക്കബ് ആന്റ് കമ്പനിയുടെ എക്സ്ക്ലൂസീവ് ലക്ഷ്വറി വിഭാഗത്തിൽപ്പെടുന്ന വാച്ചാണ് റൊണാൾഡോ സ്വന്തമാക്കിയത്. ഈ വിഭാഗത്തിൽപ്പെടുന്ന രണ്ട് മോഡലുകളാണ് കമ്പനി അവതരിപ്പിച്ചിരിക്കുന്നത്. ഫ്ലൈറ്റ് ഓഫ് സിആർ 7, ഹേർട്ട് ഓഫ് സിആർ 7 എന്നിവയാണത്.
നിരവധി രഹസ്യങ്ങളാണ് വാച്ചിൽ ഒളിപ്പിച്ചിരിക്കുന്നത്. വാച്ചിന്റെ ഉൾഭാഗത്ത് ഒരു വശത്തായി റൊണാൾഡോയുടെ ഗ്രൗണ്ടിലെ ഏറ്റവും മികച്ച നിമിഷത്തെ ഓർമ്മിപ്പിക്കുന്ന ചിത്രവും മറ്റൊരു ഭാഗത്ത് സിആർ 7 ലോഗോയും ക്രിസ്റ്റ്യാനോയുടെ ഒപ്പും പതിച്ചിട്ടുണ്ട്. വാച്ചിന്റെ മുകൾഭാഗത്തായി ഫുട്ബോളാകൃതിയും ഉൾപ്പെടുത്തിയിട്ടുണ്ട്. എന്തായാലും സാമൂഹ്യമാധ്യമങ്ങളിൽ റൊണാൾഡോയുടെ വാച്ച് ട്രെന്റിങ് ആയിട്ടുണ്ട്.
