തുർക്കിയ പ്രസിഡന്റ് റജബ് ത്വയിബ് ഉർദുഗാന് ഇതിഹാസതാരം ലയണൽ മെസ്സി ഒപ്പുചാർത്തിയ ഫുട്ബാൾ സമ്മാനമായി നൽകി ഖത്തർ അമീർ ശൈഖ് തമീം ബിൻ ഹമദ് ആൽഥാനി. ഗൾഫ് സന്ദർശനങ്ങളുടെ ഭാഗമായി തുർക്കിയ പ്രസിഡന്റ് റജബ് ത്വയ്യിബ് ഉർദുഗാൻ ചൊവ്വാഴ്ച വൈകുന്നേരമാണ് ദോഹയിലെത്തിയത്. പ്രസിഡന്റായി വീണ്ടും തെരഞ്ഞെടുക്കപ്പെട്ടശേഷം നടത്തുന്ന ആദ്യ ഗൾഫ് പര്യടനത്തിൽ സൗദിയിലെ സന്ദർശനം പൂർത്തിയാക്കിയതിനു പിന്നാലെയായിരുന്നു ഖത്തർ സന്ദർശനം. കഴിഞ്ഞ വർഷം ഖത്തറിൽ നടന്ന ലോകകപ്പ് ഫുട്ബാളിന്റെ സെമിഫൈനൽ, ഫൈനൽ മത്സരങ്ങൾക്ക് വേണ്ടി ഉപയോഗിച്ച അഡിഡാസിന്റെ ‘അൽ ഹിൽമ്’ പന്താണ് ഉർദുഗാന് അമീർ സമ്മാനമായി നൽകിയത്.
അതേസമയം തുർക്കിഷ് നിർമിത ഇലക്ട്രിക് കാറുകൾ ഉർദുഗാൻ അമീറിനും സമ്മാനമായി നൽകി. ‘ടോഗ്’ ഓട്ടോമൊബൈൽസ് നിർമിച്ച രണ്ട് കാറുകളാണ് ലുസൈൽ പാലസിൽ വെച്ച് ഉറുദുഗാൻ സമ്മാനിച്ചത്. ഇരു രാജ്യങ്ങളും തമ്മിലുള്ള അടുത്ത സൗഹൃദത്തിന്റെ പ്രതീകമായാണ് അമീറിന് തദ്ദേശീയ ബ്രാൻഡായ ‘ടോഗി’ന്റെ കാറുകൾ അദ്ദേഹം സമ്മാനിച്ചത്. കൂടാതെ ഓട്ടോമൊബൈൽ വ്യവസായത്തിന്റെയും ഇലക്ട്രിക് കാറിന്റെയും സവിശേഷതകൾ അമീറിന് വിശദീകരിച്ചു നൽകുകയും ചെയ്തു. തുടർന്ന് ഉർദുഗാനെ മുൻസീറ്റിലിരുത്തി അമീർ സ്വയം പുതുമോടിയുള്ള കാർ ഓടിച്ചു പോകുന്ന ചിത്രങ്ങളും വൈറലാണ്.
ദോഹ അന്താരാഷ്ട്ര വിമാനത്താവളത്തിൽ ഉപപ്രധാനമന്ത്രിയും പ്രതിരോധമന്ത്രിയുമായ ഡോ. ഖാലിദ് ബിൻ മുഹമ്മദ് അൽ അതിയ്യയുടെ നേതൃത്വത്തിലുള്ള ഉന്നത സംഘമാണ് തുർക്കിയ പ്രസിഡന്റ് ഉർദുഗാനെ സ്വീകരിച്ചത്. കൂടാതെ തുർക്കിയയിലെ ഖത്തർ അംബാസഡർ ശൈഖ് മുഹമ്മദ് ബിൻ നാസർ ബിൻ ജാസിം ആൽഥാനി, ഖത്തറിലെ തുർക്കിയ അംബാസഡർ ഡോ. മുസ്തഫ ഗോക്സു എന്നിവരും സ്വീകരണ വേളയിൽ സംബന്ധിച്ചു. അതേസമയം പ്രസിഡന്റിന്റെ സന്ദർശനത്തിന് മുന്നോടിയായി തുര്‍ക്കിയ വൈസ് പ്രസിഡന്റ് ഷെവ്ദെ യില്‍മസും ധനമന്ത്രി മെഹ്മെദ് സിംസേകും അടങ്ങുന്ന ഉന്നതതല സംഘം കഴിഞ്ഞയാഴ്ച ഖത്തർ സന്ദർശിച്ചിരുന്നു.
