പാരീസ് ഒളിമ്പിക്സ് ഗുസ്തിയിൽ ഇന്ത്യക്കായി മെഡൽ ഉറപ്പിച്ചിരുന്ന വിനേഷ് ഫോഗട്ടിന് തിരിച്ചടി. അനുവദനീയമായതിനേക്കാൾ ഭാരം കൂടിയെന്നതിൻ്റെ പേരിൽ വിനേഷ് ഫോഗട്ടിനെ അയോഗ്യയാക്കി. ഗുസ്തിയിൽ ഫ്രീസ്‌റ്റൈൽ 50 കിലോ ഗ്രാം വിഭാഗത്തിൽ ഫൈനലിൽ കടന്ന വിനേഷ് ഫോഗട്ടിന് ഇതോടെ മെഡൽ നഷ്ടമാകും.
ഇന്ന് രാവിലെ നടന്ന ഭാരപരിശോധനയിൽ അനുവദനീയമായതിനേക്കാൾ 100 ഗ്രാം അധികമാണെന്ന് കണ്ടെത്തിയതോടെയാണ് നടപടി. ഒളിമ്പിക്സ് ഗുസ്‌തി ഫൈനലിൽ കടക്കുന്ന ആദ്യ ഇന്ത്യൻ വനിതയെന്ന ചരിത്രനേട്ടത്തിൽ നിൽക്കെയാണ് ഫോഗട്ടിനെ അയോഗ്യയാക്കിയത്.
തീരുമാനം പുനഃപരിശോധിക്കണമെന്ന ഇന്ത്യയുടെ ആവശ്യം രാജ്യാന്തര ഒളിംപിക് അസോസിയേഷൻ തള്ളി. ഇതിനെതിരെ ഇന്ത്യ കടുത്ത പ്രതിഷേധത്തിലാണ്. ഇന്ന് രാത്രി 11.30ന് നടക്കേണ്ട ഫൈനലിൽ അമേരിക്കയുടെ സാറാ ഹിൽഡ്ബ്രാണ്ടുമായാണ് താരം ഏറ്റുമുട്ടേണ്ടിയിരുന്നത്.
