ടിക്കറ്റിന് പണം മുടക്കാതെ ടി20 ലോകകപ്പ് കാണാൻ സാധിച്ചിരുന്നെങ്കിൽ എന്ന് ആഗ്രഹിച്ചിട്ടുണ്ടോ. എങ്കിൽ ഈ വർഷം അതിന് സാധിക്കും. കാരണം ഐ.സി.സി ടി20 ലോകകപ്പ് ക്രിക്കറ്റ് സൗജന്യമായി കാണാനുള്ള അവസരമാണ് ഡിസ്‌നി പ്ലസ് ഹോട്സ്റ്റാർ ഒരുക്കിയിരിക്കുന്നത്. മൊബൈൽ ആപ്പ് ഉപയോഗിച്ച് ടിക്കറ്റിന്റെ പണം ലാഭിച്ച് മാച്ച് ലൈവായി ആസ്വദിക്കുകയും ചെയ്യാം.
ലോകകപ്പ് സൗജന്യമായി സംപ്രേഷണം ചെയ്യുന്ന വാർത്ത യൂട്യൂബ് പ്രൊമോ വീഡിയോയിലൂടെയാണ് ഹോട്സ്റ്റാർ ക്രിക്കറ്റ് ആരാധകരെ അറിയിച്ചത്. ഹോട്ട്സ്റ്റാർ സബ്സ്ക്രിപ്ഷൻ എടുക്കുന്നവർക്ക് ഒരു മാച്ച് പോലും നഷ്ടപ്പെടാതെ കാണാനും സാധിക്കും. എന്നാൽ ടി20 ലോകകപ്പ് കാണുന്നതിനുള്ള ടിക്കറ്റ് നിരക്കുമായി താരതമ്യം ചെയ്യുമ്പോൾ ഈ തുക വളരെ നിസാരവുമാണ്. മുമ്പ് 2023 ഏഷ്യാ കപ്പും 2023 ഏകദിന ലോകകപ്പും ഹോട്സ്റ്റാർ സൗജന്യമായി സംപ്രേഷണം ചെയ്‌തിരുന്നു.
മത്സരത്തിന്റെ ടിക്കറ്റ് വില്പന ആരംഭിച്ചതോടെ ക്രിക്കറ്റ് പ്രേമികൾ വൻതോതിലാണ് ടിക്കറ്റുകൾ വാങ്ങിക്കൂട്ടുന്നത്. ഇതിൽ പാക്കിസ്ഥാനും കാനഡയ്ക്കുമെതിരെയുള്ള ഇന്ത്യയുടെ മത്സരങ്ങൾ കാണാനായുള്ള ടിക്കറ്റുകൾ ചൂടപ്പം പോലെയാണ് വിറ്റഴിയുന്നത്. ജൂൺ ഒന്ന് മുതൽ 29 വരെ അമേരിക്കയിലും വെസ്റ്റ് ഇൻഡീസിലുമായാണ് ടി20 ലോകകപ്പ് നടക്കുന്നത്. നിരവധി ആരാധകർ കാത്തിരിക്കുന്ന ഇന്ത്യയും പാക്കിസ്ഥാനും തമ്മിലുള്ള പോരാട്ടം 9ന് ന്യൂയോർക്കിലാണ് നടക്കുക.
