ഫുട്ബോൾ ഇതിഹാസം ഡീഗോ മാറഡോണയുടെ ’ഗോൾഡൻ ബോൾ’ മറക്കാൻ ഫുട്ബോൾ ആരാധകർക്ക് ഒരിക്കലും സാധിക്കില്ല. ലോകത്തെ മുഴുവൻ അതിശയിപ്പിച്ച മാന്ത്രിക പ്രകടനത്തിനാണ് അദ്ദേഹത്തിന് ‘ഗോൾഡൻ ബോൾ’ പുരസ്കാരമായി ലഭിച്ചത്. ഇപ്പോൾ ഈ ഗോൾഡൻ ബോൾ സ്വന്തമാക്കാൻ നിങ്ങൾക്കും അവസരം വന്നിരിക്കുകയാണ്.
1986 ലോകകപ്പിലെ മികച്ച താരമായി തിരഞ്ഞെടുക്കപ്പെട്ടപ്പോൾ ലഭിച്ച ട്രോഫിയാണ് ലേലത്തിൽ വെക്കുന്നത്. ജൂണിലാകും ലേലം നടക്കുകയെന്നാണ് റിപ്പേർട്ട്. എന്നാൽ അടിസ്ഥാനവില ഇതുവരെ നിശ്ചയിച്ചിട്ടില്ല. അതേസമയം ഇംഗ്ലണ്ടിനെതിരായ മത്സരത്തിൽ മാറഡോണ ധരിച്ച ജെഴ്സി നേരത്തെ തന്നെ ലേലം ചെയ്‌തിരുന്നു. ആദ്യമായാണ് ലോകകപ്പിലെ ഗോൾഡൻ ബോൾ ലേലത്തിന് വെക്കുന്നത്.
ലോകകപ്പിൽ ക്വാർട്ടർഫൈനലിൽ ഇംഗ്ലണ്ടിനെതിരെ മാറഡോണ നേടിയ രണ്ടു ഗോളും ചരിത്രത്തിൽ ഇടംപിടിച്ചിരുന്നു. ആദ്യ ഗോൾ ‘ദൈവത്തിൻ്റെ കൈ’ എന്നും രണ്ടാമത്തേത് ‘നൂറ്റാണ്ടിന്റെ ഗോൾ’ എന്നുമാണ് അറിയപ്പെടുന്നത്. ടൂർണമെന്റിൽ മാറഡോണ അഞ്ച് ഗോൾ നേടിയിരുന്നു. ഫൈനലിൽ ജർമനിയെ തോൽപ്പിച്ചാണ് അർജന്റീന കിരീടം ചൂടിയത്.
