ഈ വർഷത്തെ പാർലമെന്റ് തെരഞ്ഞെടുപ്പിൽ കേരളത്തിൽ വോട്ടർപട്ടികയിൽ ഉള്ളത് 89,839 പ്രവാസി വോട്ടർമാരാണ്. ഇവരിൽ കൂടുതൽ പേരും വിവിധ ജി.സി.സി രാജ്യങ്ങളിൽ കഴിയുന്നവരുമാണ്. തെരഞ്ഞെടുപ്പ് തീയതി അടുത്തുകൊണ്ടിരിക്കുന്ന സാഹചര്യത്തിൽ പരമാവധി വോട്ടർമാരെ നാട്ടിലെത്തിക്കാനുള്ള ശ്രമത്തിലാണ് പ്രവാസി സംഘടനകൾ. കുവൈറ്റിൽ എൽ.ഡി.എഫ്, യു.ഡി.എഫ് എന്നിവ ചർച്ചകൾ ആരംഭിച്ചിട്ടുണ്ട്. കെ.എം.സി.സിയും തങ്ങളുടെ വോട്ടർമാരെ നാട്ടിൽ എത്തിക്കാനുള്ള തയാറെടുപ്പുകൾ നടത്തിവരുകയാണ്. മാത്രമല്ല, അവധിക്ക് നാട്ടിൽ പോകാൻ തെരഞ്ഞെടുപ്പ് സമയം തിരഞ്ഞെടുത്തവരും ഉണ്ട്.
മുൻ വർഷങ്ങളിലെ പോലെ പ്രത്യേക വിമാനം ഏർപ്പെടുത്തി വോട്ടർമാരെ നാട്ടിലെത്തിക്കാനുമുള്ള ആലോചനയിലാണ് സംഘടനകൾ. മാത്രമല്ല, ആളുകൾ കൂടുതൽ ഉണ്ടെങ്കിൽ വിമാനങ്ങൾ ചാർട്ടർ ചെയ്ത് വോട്ടർമാരെ നാട്ടിലെത്തിക്കാനും ശ്രമംതുടരുന്നുണ്ട്. ഇതിനായി വോട്ടർ പട്ടിക പരിശോധിച്ച് വോട്ടുള്ള പ്രവാസികളെ കണ്ടെത്തിക്കൊണ്ടിരിക്കുകയാണ്. കുവൈറ്റിൽ എൽ.ഡി.എഫ് തെരഞ്ഞെടുപ്പ് കമ്മിറ്റി 20 മണ്ഡലം കൺവെൻഷനുകളും ഇതിനോടകം തന്നെ പൂർത്തീകരിച്ചിട്ടുണ്ട്. ഒ.ഐ.സി.സി ഞായറാഴ്ച പ്രത്യേക പരിപാടി ആസൂത്രണം ചെയ്തിട്ടുണ്ട്.
അതേസമയം, സ്ഥാനാർഥികൾ കൺവെൻഷനുകളിൽ ഓൺലൈനായി വന്ന് നാട്ടിലെത്തി വോട്ട് ചെയ്യാനാവശ്യപ്പെടുകയും ചെയ്യുന്നുണ്ട്. ആകെ 89,839 പ്രവാസി വോട്ടർമാരിൽ 83,765 പേർ പുരുഷന്മാരും 6,065 പേർ സ്ത്രീകളും ഒമ്പതുപേർ ട്രാൻസ്ജെൻഡേഴ്സുമാണ്. കോഴിക്കോട്ടുകാരാണ് ഇവരിൽ കൂടുതൽ. 35,793 പേരുണ്ട്. തൊട്ടുപിന്നിലുള്ള മലപ്പുറത്തും കണ്ണൂരിലും യഥാക്രമം 15, 121ഉം 12, 876ഉം പ്രവാസി വോട്ടർമാരാണുള്ളത്. വയനാട്ടിൽ നിന്നും 779 പ്രവാസി വോട്ടർമാരാണുള്ളത്. ഏറ്റവും കുറവ് ഇടുക്കിയിലാണുള്ളത്. 325 പ്രവാസി വോട്ടർമാർ.
