‘ഒരു രാജ്യം ഒരു തിരഞ്ഞെടുപ്പ്’ നിയമം 2034 വരെ നടപ്പിലായേക്കില്ലെന്ന് സൂചന. ലോകസഭയിലേക്കും സംസ്ഥാന നിയമസഭകളിലേക്കും ഒരുമിച്ച് തിരഞ്ഞെടുപ്പ് നടത്താനുദ്ദേശിച്ച് കൊണ്ടുവരുന്ന നിയമമാണിത്. പാർലമെൻ്റിൽ ഇതുമായി ബന്ധപ്പെട്ട ബിൽ അവതരിപ്പിക്കാനിരിക്കെ അതിലെ വിവരങ്ങൾ പുറത്തായിട്ടുണ്ട്.
ഇതിലെ വിവരങ്ങൾ പ്രകാരം ഒരു രാജ്യം ഒരു തിരഞ്ഞെടുപ്പ് നിയമം പ്രാബല്യത്തിലാകുന്നതിന് മുമ്പ് ഏതെങ്കിലും നിയമസഭയുടെ കാലാവധി കഴിയുന്ന സാഹചര്യമുണ്ടായാൽ അവിടെ ഇടക്കാല തിരഞ്ഞെടുപ്പ് നടക്കും. ഇങ്ങനെ നിലവിൽ വരുന്ന നിയമസഭയ്ക്ക് നിയമം പ്രാബല്യത്തിലാകുന്നതുവരെയോ അല്ലെങ്കിൽ ലോകസഭയുടെ കാലാവധി കഴിയുന്നതുവരെയോ ആകും കാലാവധിയുണ്ടാകുക.
ഭരണഘടനയുടെ 129-ാം ഭേദഗതിയായാണ് ഒരു രാജ്യം ഒരു തിരഞ്ഞെടുപ്പ് ബിൽ പാർലമെന്റിൽ എത്തുക. ബില്ലിന് കേന്ദ്രമന്ത്രിസഭ നേരത്തെ അംഗീകാരം നൽകിയിരുന്നു. 2029ലാണ് അടുത്ത ലോക്‌സഭാ തിരഞ്ഞെടുപ്പ് നടക്കുക. എന്നാൽ ബില്ലിലെ വിവരങ്ങൾ അനുസരിച്ച് 2034ൽ മാത്രമേ നിയമസഭകളിലേക്കും ലോക്‌സഭയിലേക്കും ഒന്നിച്ച് തിരഞ്ഞെടുപ്പ് നടക്കൂ.
