സിനിമകൾക്ക് പുറമെ ഷോർട്ട് ഫിലിമിലും താരമായി മലയാളികളുടെ സ്വന്തം മോഹൻലാൽ. ട്രാഫിക് ബോധവത്ക്കരണത്തിന്റെ ഭാഗമായി കൊച്ചി സിറ്റി ട്രാഫിക് പോലീസ് ഒരുക്കിയ ‘ശുഭയാത്ര’ എന്ന ഷോർട്ട് ഫിലിമിന്റെ ഭാഗമായിരിക്കുകയാണ് മോഹൻലാൽ.
‘സിനിമയിലെ പോലെ യഥാർത്ഥ ജീവിതത്തിൽ റീടേക്കുകൾ ഇല്ല’ എന്ന് മോഹൻലാൽ പറയുന്ന വാക്കുകളാണ് ചിത്രത്തിന്റെ ഇതിവൃത്തം. 10 മിനിറ്റ് ദൈർഘ്യമാണ് ചിത്രത്തിനുള്ളത്. ശുഭയാത്രയുടെ ഒഫീഷ്യൽ യൂട്യൂബ് റിലീസ് മോഹൻലാൽ, ഇന്ദ്രജിത്ത്, ബേസിൽ ജോസഫ്, മെൻ്റലിസ്റ്റ് ആദി തുടങ്ങി 45-ഓളം താരങ്ങളുടെ സോഷ്യൽ മീഡിയയിലൂടെ നടന്നു.
ലറിഷ് തിരക്കഥയും സംവിധാനവും നിർവ്വഹിച്ച ശുഭയാത്ര സിനിമയുടെ അതേ ക്വാളിറ്റിയിലാണ് ചിത്രീകരിച്ചിരിക്കുന്നത്. റോഡപകടങ്ങൾ കുറയ്ക്കുന്നതിന്റെ ഭാഗമായി പൊതുജനങ്ങൾക്ക് ട്രാഫിക് ബോധവത്ക്കരണം നൽകുകയാണ് ഹ്രസ്വചിത്രത്തിലൂടെ ലക്ഷ്യമിടുന്നത്.
