മുൻ മന്ത്രി സജി ചെറിയാന്റെ വകുപ്പുകൾ മൂന്ന് മന്ത്രിമാർക്കായി വിഭജിച്ച് നൽകി. പി എ മുഹമ്മദ് റിയാസ്, വി അബ്ദുറഹ്മാൻ, വി എൻ വാസവൻ എന്നിവർക്കാണ് വകുപ്പുകൾ നൽകിയത്. ഇത് സംബന്ധിച്ച മുഖ്യമന്ത്രിയുടെ ശുപാർശ ഗവർണർ അംഗീകരിച്ചു.
സാംസ്കാരിക വകുപ്പ് വി എൻ വാസവനാണ് നൽകിയത്. യുവജനക്ഷേമ വകുപ്പിന്റെ ചുമതല പി എ മുഹമ്മദ് റിയാസിന് നൽകി. ഫിഷറീസ് വകുപ്പ് വി അബ്ദുറഹ്മാൻ കൈകാര്യം ചെയ്യും. സര്‍ക്കാര്‍ വിജ്ഞാപനം ഉടന്‍ പുറത്തിറക്കും. സജി ചെറിയാന് പകരം തത്കാലം പുതിയ മന്ത്രിയുണ്ടാവില്ലെന്ന് മുഖ്യമന്ത്രി പിണറായി വിജയൻ നേരത്തെ വ്യക്തമാക്കിയിരുന്നു. സിപിഐഎം സംസ്ഥാന സെക്രട്ടറി കോടിയേരി ബാലകൃഷ്ണനും വകുപ്പ് വിഭജനം മുഖ്യമന്ത്രിക്ക് തീരുമാനിക്കാം എന്ന നിലപാടാണ് സ്വീകരിച്ചത്.
ഭരണഘടനാ വിരുദ്ധ പരാമർശം നടത്തിയതിനെ തുടർന്നാണ് സജി ചെറിയാൻ മന്ത്രി സ്ഥാനം രാജിവച്ചത്. ജനത്തെ കൊള്ളയടിക്കാൻ പറ്റിയ മനോഹരമായ ഭരണഘടനയാണ് രാജ്യത്തിന്റേതെന്നും ബ്രിട്ടീഷുകാരൻ പറഞ്ഞതാണ് ഭരണഘടനയിൽ ഉള്ളതെന്നുമായിരുന്നു പരാമർശം.
