ആലപ്പുഴയിൽ ആറു വയസ്സുകാരിയായ മകളെ കൊലപ്പെടുത്തിയ കേസിലെ പ്രതിയായ പിതാവ് ജയിലിലേക്ക് കൊണ്ടുപോകും വഴി ട്രെയിനിൽ നിന്ന് ചാടി മരിച്ചു. പുന്നമൂട് ആനക്കൂട്ടിൽ ശ്രീമഹേഷ് ആണ് ശാസ്താംകോട്ടയിൽ വച്ച് ട്രെയിനിൽ നിന്ന് ചാടി മരിച്ചത്.
ആലപ്പുഴ അഡീഷണൽ സെഷൻസ് ജഡ്ജി മുൻപാകെ കുറ്റപത്രം വായിച്ചു കേൾപ്പിക്കുന്നതിനായി കോടതിയിലേക്ക് കൊണ്ടുവന്നതിന് ശേഷം തിരികെ തിരുവനന്തപുരം സെൻട്രൽ ജയിലിലേക്ക് കൊണ്ടുപോകും വഴിയാണ് സംഭവം. പെട്ടന്ന് കൂടെയുണ്ടായിരുന്ന പൊലീസുകാരെ തള്ളി മാറ്റുകയും ട്രെയിനിൽ നിന്നും പുറത്തേക്ക് ചാടുകയുമായിരുന്നു. ഇതിന് മുൻപ് ശ്രീമഹേഷ് ജയിലിൽ വച്ച് ബ്ലെയ്ഡ് ഉപയോഗിച്ച് ആത്മഹത്യയ്ക്ക് ശ്രമിച്ചിരുന്നു.
2023 ജൂൺ ഏഴിന് രാത്രി ഏഴരയോടെയാണ് മഴു ഉപയോഗിച്ച് മകളായ നക്ഷത്രയെ ശ്രീമഹേഷ് വെട്ടി കൊലപ്പെടുത്തിയത്. ബഹളം കേട്ട് ഓടിയെത്തിയ സ്വന്തം മാതാവിനെയും പ്രതി വെട്ടിപ്പരുക്കേൽപ്പിച്ചിരുന്നു. കൊലപാതകം നടത്തി തൊട്ടടുത്ത ദിവസം തന്നെ പ്രതിയെ പോലീസ് റിമാൻഡ് ചെയ്യുകയും ചെയ്തു.
ആദ്യ ഭാര്യയുടെ മരണശേഷം പുനർ വിവാഹം കഴിക്കാനുള്ള ശ്രീമഹേഷിന്റെ ഉദ്യമത്തിൽ തടസ്സമായതിനാലാണ് മകളെ അതിക്രൂരമായി കൊലപ്പെടുത്തിയത്. കുറ്റകൃത്യം നടന്നശേഷം ഉടൻതന്നെ അറസ്റ്റിലായ ശ്രീ മഹേഷിനെതിരായ കുറ്റപത്രം 76 ദിവസത്തിനുള്ളിൽ തന്നെ പോലീസ് ഫയൽ ചെയ്തിരുന്നു. അന്വേഷണ ഉദ്യോഗസ്ഥനായ മാവേലിക്കര എസ്എച്ച്ഒ സി.ശ്രീജിത്‌ ആണ് കുറ്റപത്രം സമർപ്പിച്ചത്.. സാക്ഷി വിസ്താരം ജനുവരി 16 ന് ആരംഭിക്കാനായി കേസ് കോടതി മാറ്റുകയും ചെയ്തിരുന്നു.
മുന്നറിയിപ്പ് : ആത്മഹത്യ ഒന്നിനും ഒരു പരിഹാരമല്ല
