കേരളത്തിലെ അഗ്നിപഥ് കരസേനാ റിക്രൂട്ട്‌മെന്റ് റാലി നടത്താനുള്ള തീയതികൾ പ്രഖ്യാപിച്ചു. ജൂലൈ ഒന്ന് മുതൽ റജിസ്ട്രേഷൻ തുടങ്ങിയിരുന്നു. ജൂലൈ 30 വരെ ഓൺലൈനായി അപേക്ഷിക്കാൻ അവസരമുണ്ട്. വടക്കൻ കേരളത്തിൽ ഒക്ടോബർ 1 മുതൽ 20 വരെ കോഴിക്കോട്ട്‌ വെച്ച് റാലിനടക്കും. കോഴിക്കോട്, കാസർകോട്, പാലക്കാട്, മലപ്പുറം, വയനാട്, തൃശ്ശൂർ, കണ്ണൂർ ജില്ലകൾ കൂടാതെ ലക്ഷദ്വീപ്, മാഹി കേന്ദ്രഭരണപ്രദേശങ്ങളിൽ നിന്നുള്ളവർക്കും പങ്കെടുക്കാം.
തെക്കൻ കേരളത്തിൽ ഏഴു ജില്ലകൾക്കായി നവംബർ 15 മുതൽ 30 വരെ കൊല്ലത്താണ് റാലി നടത്തുക. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം ജില്ലക്കാർക്ക് റാലിയിൽ പങ്കെടുക്കാം. തീയതിയിൽ പിന്നീട് ചെറിയ മാറ്റം ഉണ്ടായേക്കുമെന്ന് കരസേന അറിയിച്ചു. വിവരങ്ങൾക്ക് joinindianarmy.nic.in എന്ന വെബ്സൈറ്റ് സന്ദർശിക്കാവുന്നതാണ്. നാവികസേനയിൽ അഗ്നിപഥ് രജിസ്ട്രേഷൻ വെള്ളിയാഴ്ച മുതൽ തുടങ്ങും. വനിതകൾക്കും അപേക്ഷിക്കാവുന്നതാണ്. വെബ്സൈറ്റ്: joinindiannavy.gov.in.
