അന്തരിച്ച മുന്‍ മുഖ്യമന്ത്രി ഉമ്മന്‍ചാണ്ടിയുടെ സ്മരണാർത്ഥം പുതുപ്പളളിയില്‍ 25 നിര്‍ധന കുടുംബങ്ങള്‍ക്ക് വീടൊരുങ്ങുന്നു. വാകത്താനം മുതല്‍ പാമ്പാടി വരെ പുതുപ്പളളി നിയോജകമണ്ഡലത്തിലെ എട്ട് പഞ്ചായത്തുകളിലായാണ് 25 വീടുകള്‍ നിർമ്മിക്കുന്നത്. ഉമ്മന്‍ചാണ്ടിയുടെ ഒന്നാം ഓര്‍മ്മദിനമായ ജൂലായ് 18-ന് വീടുകളുടെ താക്കോൽ കൈമാറുമെന്ന് എംഎല്‍എ ചാണ്ടി ഉമ്മൻ പറഞ്ഞു.
25-ല്‍ ഇരുപത് വീടുകളുടെയും ശിലാസ്ഥാപനം ഒരേ ദിവസമാണ് പൂര്‍ത്തിയായത്. ഉമ്മന്‍ചാണ്ടി രൂപീകരിച്ച ആശ്രയ ട്രസ്റ്റിന് കീഴില്‍ അദ്ദേഹത്തിന്റെ മകനും എംഎല്‍എയുമായ ചാണ്ടി ഉമ്മന്‍റെ നേതൃത്വത്തിലാണ് വീടുകളുടെ നിര്‍മ്മാണം പുരോഗമിക്കുന്നത്. ചാണ്ടി ഉമ്മൻ തന്നെയാണ് വീടുകളുടെ തറക്കല്ലിടൽ നടത്തിയത്.
പുതുപ്പള്ളിയിലൊരുങ്ങുന്ന വീടുകള്‍ക്ക് പുറമെ സംസ്ഥാനത്തിന്റെ വിവിധ ജില്ലകളിലായി അഞ്ച് വീടുകളുടെ നിര്‍മ്മാണവും ആശ്രയ ട്രസ്റ്റ് പൂർത്തിയാക്കിവരികയാണ്.
