സൂര്യനെ കുറിച്ച് പഠിക്കാനുള്ള ഇന്ത്യയുടെ ആദ്യ ബഹിരാകാശ ദൗത്യമായ ആദിത്യ എൽ1 ബഹിരാകാശ പേടകം അതിന്റെ അവസാന ഘട്ടത്തിലേക്ക് അടുക്കുകയാണ്, 2024 ജനുവരി 7 നകം എൽ 1 പോയിന്റിലേക്ക് പ്രവേശിക്കാനുള്ള നീക്കങ്ങൾ പൂർത്തിയാകുമെന്ന് ഐഎസ്ആർഒ ചെയർമാൻ എസ് സോമനാഥ് പറഞ്ഞു.
ആദ്യ റോക്കറ്റ് വിക്ഷേപണത്തിന്റെ 60-ാം വർഷത്തിന്റെ ഭാഗമായി വിഎസ്എസ്‌സിയിൽ സംഘടിപ്പിച്ച ഒരു പരിപാടിയുടെ ഭാഗമായാണ് ഐഎസ്ആർഒ മേധാവിഇക്കാര്യം വ്യക്തമാക്കിയത്. ബഹിരാകാശ പേടകം എൽ1 പോയിന്റിൽ പ്രവേശിക്കുന്നതിനുള്ള അവസാന തയ്യാറെടുപ്പുകൾ ഇപ്പോൾ പുരോഗമിച്ചുകൊണ്ടിരിക്കുകയാണെന്ന് അദ്ദേഹം പറഞ്ഞു. “ഒരുപക്ഷേ ജനുവരി 7 ന്, എൽ 1 പോയിന്റിലേക്ക് പ്രവേശിക്കുന്നതിനുള്ള അവസാന നീക്കങ്ങൾ നടത്താം,” സോമനാഥ് കൂട്ടിച്ചേർത്തു.
സെപ്റ്റംബർ രണ്ടിനാണ് ശ്രീഹരിക്കോട്ടയിലെ സതീഷ് ധവാൻ സ്‌പേസ് സെന്ററിൽ (എസ്‌ഡിഎസ്‌സി) നിന്ന് ആദിത്യ എൽ1 വിജയകരമായി വിക്ഷേപിച്ചത്. 125 ദിവസങ്ങളിൽ ഭൂമിയിൽ നിന്ന് ഏകദേശം 1.5 ദശലക്ഷം കിലോമീറ്റർ സഞ്ചരിച്ച ശേഷം, ബഹിരാകാശ പേടകം, സൂര്യനോട് ഏറ്റവും അടുത്ത് കണക്കാക്കപ്പെടുന്ന ലാഗ്രാൻജിയൻ പോയിന്റ് L1 ന് ചുറ്റുമുള്ള ഒരു ഹാലോ ഭ്രമണപഥത്തിൽ സ്ഥാപിക്കുമെന്ന് പ്രതീക്ഷിക്കുന്നു.
