ദൈവത്തേക്കാൾ അറിവുള്ള ആളായി നടിക്കുകയാണ് പ്രധാനമന്ത്രിയെന്ന് രാഹുൽ ഗാന്ധി. ഒരു പരിപാടിയിൽ അമേരിക്കയിലെ വിദ്യാർത്ഥികളുമായി സംവദിക്കുന്നതിനിടയിലാണ് വിമർശനം ഉന്നയിച്ചത്. എല്ലാം അറിയാമെന്ന ഭാവമാണ് മോദിക്ക്. ശാസ്ത്രജ്ഞന്മാരെയും സൈനികരേയും വരെ ഉപദേശിക്കുകയാണ്. ബിജെപിയിൽ ചോദ്യങ്ങളില്ല, ഉത്തരങ്ങൾ മാത്രമേയുള്ളൂവെന്നും രാഹുൽഗാന്ധി പരിഹസിച്ചു.
വനിത സംവരണ ബിൽ കോൺഗ്രസ് പാസാക്കാനാണ് ശ്രമിച്ചത്. എന്നാൽ സഖ്യകക്ഷികളിൽ ചിലർ എതിർപ്പ് പ്രകടിപ്പിക്കുകയായിരുന്നു. കോൺഗ്രസ് അധികാരത്തിൽ എത്തിയാൽ ബിൽ പാസാക്കും. ഭരണഘടനയിൽ ഇന്ത്യ എന്നത് യൂണിയൻ ഓഫ് സ്റ്റേറ്റ് ആണ്. ഓരോ സംസ്ഥാനത്തെയും സംസ്കാരത്തെയും ഭാഷകളെയും ചരിത്രത്തെയും സംരക്ഷിക്കേണ്ടതുണ്ടെന്നും അദ്ദേഹം പറഞ്ഞു.
ഭാരത് ജോഡോ യാത്ര തനിക്ക് വലിയ അനുഭവമായിരുന്നു. ഇന്ത്യ ഒരു ആശയത്തെയും തിരസ്കരിച്ചിട്ടില്ല. ഇന്ത്യയിലെ ജനങ്ങൾ വെറുപ്പിൽ വിശ്വസിക്കുന്നവരും പരസ്പരം കൊല്ലുന്നവരുമല്ല. ഒരു ചെറിയ വിഭാഗം മാത്രമാണ് ഇതിന് പിന്നിൽ പ്രവർത്തിക്കുന്നതെന്നും അദ്ദേഹം കൂട്ടിച്ചേർത്തു.
