ഒഡീഷയിൽ ട്രെയിനുകൾ കൂട്ടിയിടിച്ച് 50ഓളം പേർക്ക് പരിക്ക്. ഷാലിമാറിൽ നിന്ന് ചെന്നൈ സെൻട്രലിലേക്ക് പോകുകയായിരുന്ന 12841 നമ്പർ കോറോമണ്ടേൽ എക്സ്പ്രസും ഗുഡ്സ് ട്രെയിനുമാണ് കൂട്ടിയിടിച്ചത്. ബാലസോറ ജില്ലയിലെ ബഹനാഗ ബസാർ റെയിൽവേ സ്റ്റേഷന് സമീപം വെച്ചാണ് അപകടം സംഭവിച്ചത്. കോറോമണ്ടേൽ എക്സ്പ്രസിന്റെ കോച്ചുകൾ അടുത്ത ട്രാക്കിലേക്ക് വീണതിനേത്തുടർന്ന് മറ്റൊരു ട്രെയിനും അപകടത്തിൽപ്പെട്ടു.
കോറോമാണ്ടൽ എക്സ്പ്രസിന്റെ പത്തോളം കോച്ചുകൾ പാളം തെറ്റി. പാളം തെറ്റിയ ട്രെയിൻ കോച്ചുകൾ തൊട്ടടുത്ത ട്രാക്കിലേക്ക് തെറിച്ച് വീണതിനേത്തുടർന്ന് അടുത്ത ട്രാക്കിലൂടെ പോവുകയായിരുന്ന മൂന്നാമതൊരു ട്രെയിൻ കൂടി അപകടത്തിൽപ്പെടുകയായിരുന്നു. യശ്വന്ത്പുറിൽ നിന്നും ഹൗറയിലേക്ക് പോവുകയായിരുന്ന 12864 ബംഗളൂരു ഹൗറ സൂപ്പർഫാസ്റ്റ് എക്സ്പ്രസാണ് അപകടത്തിൽപ്പെട്ടത്.
ഈ ട്രെയിനിന്റെ 3-4 കോച്ചുകളാണ് അപകടത്തിൽപ്പെട്ടത്. പരിക്കേറ്റവരെ ആശുപത്രിയിലേക്ക് മാറ്റി. സ്ഥലത്ത് രക്ഷാപ്രവർത്തനം പുരോഗമിക്കുകയാണ്.
