വനിതാ സുഹൃത്തിനെ പൈലറ്റ് കോക്പിറ്റിൽ പ്രവേശിപ്പിച്ച സംഭവത്തിൽ എയർ ഇന്ത്യയ്ക്ക് 30 ലക്ഷം രൂപ പിഴ ചുമത്തി. കൂടാതെ പൈലറ്റിന്റെ ലൈസൻസ് ഡിജിസിഎ മൂന്നുമാസത്തേക്ക് സസ്പെൻഡ് ചെയ്യുകയും ചെയ്തു. ഫെബ്രുവരി 27ന് ഡൽഹിയിൽ നിന്നും ദുബായിലേക്ക് പോകുകയായിരുന്ന എയർ ഇന്ത്യ വിമാനത്തിലായിരുന്നു സംഭവം.
കമാൻഡ് ഡ്യൂട്ടിയിലുണ്ടായിരുന്ന പൈലറ്റ് യാത്രക്കാരിയായ ജീവനക്കാരിയ്ക്ക് കോക്പിറ്റിലേക്ക് പ്രവേശിക്കാൻ അനുമതി നൽകി. ഇത് ചട്ടങ്ങൾക്ക് വിരുദ്ധമാണെന്ന് ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (ഡിജിസിഎ) അറിയിച്ചു. എയർക്രാഫ്റ്റ് റൂൾസ് 1937 അനുസരിച്ച് അധികാരം ദുരുപയോഗം ചെയ്തതിനാണ് പൈലറ്റിന്റെ ലൈസൻസ് മൂന്നു മാസത്തേക്ക് സസ്പെൻഡ് ചെയ്തത്. കൂടാതെ നിയമലംഘനം തടയാൻ ശ്രമിക്കാത്ത കോ പൈലറ്റിന് മുന്നറിയിപ്പ് നൽകിയിട്ടുണ്ടെന്നും ഡിജിസിഎ പറഞ്ഞു.
