സ്വദേശിവത്കരണം പ്രോത്സാഹിപ്പിക്കുന്നതിന്‍റെ ഭാഗമായി യുഎഇയില്‍ കമ്പനികളെ തരംതിരിക്കുന്ന നടപടികൾക്ക് തുടക്കം. സ്വകാര്യ മേഖലയിലെ കമ്പനികളെ മൂന്നായി തരംതിരിക്കുന്ന നടപടികളാണ് മാനവ വിഭവശേഷി – എമിറേറ്റൈസേഷൻ മന്ത്രാലയം ആരംഭിച്ചത്. കമ്പനികളുടെ നിയമ വേതന സംവിധാനങ്ങൾ, തൊഴിലാളികളുടെ അവകാശ സംരക്ഷണം, സാംസ്കാരികവും ജനസംഖ്യാപരവുമായ വൈവിധ്യം എന്നിവ കണക്കിലെടുത്താണ് തരംതിരിക്കല്‍.
വ്യവസ്ഥയനുസരിച്ച് രണ്ടു ശതമാനം സ്വദേശികളെ നിയമിക്കുകയും വേതന, സംരക്ഷണം സംവിധാനം കാര്യക്ഷമമായി നടപ്പാക്കുകയും ചെയ്യുന്ന കമ്പനികളാണ് ആദ്യ വിഭാഗത്തില്‍ ഉൾപ്പെടുക. ഇത്തരം കമ്പനികൾക്ക് നികുതിയിനത്തില്‍ 93 ശതമാനം കി‍ഴിവ് വരെ നിശ്ചയിച്ചിട്ടുണ്ട്. എന്നാല്‍ യുഎഇയിലെ തൊ‍ഴില്‍ നിയമങ്ങൾ എല്ലാം പാലിക്കുന്നതും ഇതര മാനദണ്ഡങ്ങൾ പാലിക്കാന്‍ ക‍ഴിയാത്തുമായ കമ്പനികളാണ് കാറ്റഗറി രണ്ടില്‍ വരിക. തൊ‍ഴില്‍ നിയമങ്ങൾ ലംഘിക്കുന്ന കമ്പനികളെ മൂന്നാമത്തെ വിഭാഗത്തിലും ഉൾപ്പെടുത്തും.
യുഎഇയുടെ ദേശീയ ലക്ഷ്യങ്ങളെ പിന്തുണയ്ക്കുക, വ്യവസായ മേഖലയില്‍ ആഗോള നേതൃത്വം കൈവരിക്കുക, തുടങ്ങിയ പ്രവര്‍ത്തനങ്ങൾക്ക് മന്ത്രാലയം പിന്തുണ നല്‍കുന്നതായി മാനവ വിഭവശേഷി, എമിറേറ്റൈസേഷൻ മന്ത്രി ഡോ അബ്ദുൾറഹ്മാൻ അൽ അവാർ വ്യക്തമാക്കി. സ്വദേശി പൗരന്‍മാരുടെ തൊ‍ഴില്‍ മത്സര ശേഷി വർദ്ധിപ്പിക്കുന്നതിനും സ്വകാര്യമേഖലയിൽ ജോലിചെയ്യാൻ പൗരന്‍മാരെ പ്രാപ്തരാക്കുന്നതിനും മന്ത്രാലയം മുന്‍ഗണന നല്‍കുന്നുണ്ടെന്നും അദ്ദേഹം പറഞ്ഞു.
