എം.പിയായി സത്യപ്രതിജ്ഞ ചെയ്യുന്നതിന് മുൻപ് ദൈവനാമം ജപിച്ച് കേന്ദ്രമന്ത്രി സുരേഷ് ഗോപി. സത്യപ്രതിജ്ഞയ്ക്ക് മുൻപ് അദ്ദേഹം ‘കൃഷ്ണാ.. ഗുരുവായുരപ്പാ.. ഭഗവാനേ..’ എന്ന് ചൊല്ലിയാണ് പീഠത്തിന് അരികിലേക്ക് എത്തിയത്. തുടർന്ന് മലയാളത്തിലാണ് സുരേഷ് ഗോപി സത്യപ്രതിജ്ഞ ചെയ്തത്.
18-ാം ലോക്സഭയുടെ പ്രഥമ സമ്മേളനത്തിനാണ് ഇപ്പോൾ തുടക്കമായിരിക്കുന്നത്. പ്രധാനമന്ത്രി നരേന്ദ്രമോദി സത്യവാചകം ചൊല്ലി സത്യപ്രതിജ്ഞ ചെയ്തതിന് പിന്നാലെ കേന്ദ്രമന്ത്രിമാരും എം.പിമാരും സത്യപ്രതിജ്ഞ ചെയ്തു. കേന്ദ്രമന്ത്രി എന്ന നിലയിലാണ് സുരേഷ് ഗോപിയുടെ സത്യപ്രതിജ്ഞ ആദ്യം നടന്നത്. പുതിയ അംഗങ്ങൾ രണ്ട് ദിവസങ്ങളിലായാണ് സത്യപ്രതിജ്ഞ ചെയ്യുക.
ലോക്സഭാ തിരഞ്ഞെടുപ്പിൽ കേരളത്തിൽ നിന്നും വിജയിച്ച ഏക ബിജെപി അംഗമാണ് സുരേഷ് ഗോപി. കേരളത്തിൽ നിന്നുള്ള മറ്റൊരു കേന്ദ്രമന്ത്രി ജോർജ് കുര്യനും സത്യപ്രതിജ്ഞ ചെയ്തു. കേരളത്തിൽ നിന്നുള്ള മറ്റ് എംപിമാരുടെ സത്യപ്രതിജ്ഞ വൈകുന്നേരം നാല് മണിയോടെയാകും നടക്കുക.
